MAUBISE, (TATOLI)-Juventude husi nasaun viziñu Austrália, Indonézia, inklui Japaun hamutuk ho juventude Timor-Leste mai husi Munisípiu 13, kuaze 700 partisipa iha atividade akampamentu PERMATIL (Permakultura Timor-Leste) Juventude hodi selebra loron nasionál juventude iha Timor-Leste. Inklui, promove mós formasaun karaktér ba foinsa’e sira nian.
Akampamentu ne’e hahú 25 novembru to’o 31 dezembru 2018 ho tópiku Rekursu Naturál no Matenek Lokál kona-ba Moris. Akampamentu ne’e ba dala lima no realiza hamutuk ho organizasaun FINFES ba daruak.
“Ami-nia observasaun durante ne’e katak dezenvolvimentu juventude, ita hasa’e sira-nia skill ka koñesimentu ne’e fásil maibé formasaun karaktér ne’e mak parte ida ne’ebé ita lakon iha ita-nia sosiedade. Tan ida ne’e, akampamentu ida ne’e nia lala’ok mak nia fokus oinsá atu forma juventude nia karakter,” informa Diretór PERMATIL, Eugénio “Ego” Lemos, ba jornalísta sira iha Munisípiu Ainaro, Postu Administrativu Maubise, Kinta lorokra’ik (29/11).
Diretór PERMATIL, Ego Lemos informa liután katak bainhira akampamentu hahú 25 novembru iha Maubise, hasoru kedas ho udan, nune’e joventude idaidak tenke prepara tenda, ke’e bee dalan, hasai sapatu, sinelus hodi la’o ain-tanan iha taho laran. “Ida ne’e, ita hahú fila fali atu forma karaktér juventude, sira hadomi natureza no koko atu adapta ho natureza,” haktuir diretór ne’e.
Diretór PERMATIL, Ego Lemos relata durante akampa, fó formasaun; iha 14. Ezemplu, formasaun kona-ba te’in, indústria uma-kain, akuakultura, ortikultura, pekuária, konservasaun kona-ba bee-matan no kria debu, formasaun kona-ba jestaun jere kafé nomós viveirus ai-oan no agro-florestál. “Iha formasaun barak tebes, hahú husi tuku 08:30 to’o 12h30,” nia haktuir.
Diretór ne’e informa katak orsamentu ba atividade ne’e mai husi PNUD (Programa Nasaun Unida ba Dezenvolvimentu), Plan International, organizasaun França nian ida mós, USA Avansa nomós organizasaun Iosona-Japaun.
“Nomós kontribuisaun ki’ikoan balun husi Sidade Amizade sira, depois mós income support husi Ministériu Obras Públika hodi hadi’a dalan, depois SEKOMS hodi monta rádiu mobile iha área akampamentu nomós Sekretáriu Estadu mobiliza sentru juventude sira husi munisípiu,” akresenta Diretór PERMATIL, Ego Lemos.
Iha fatin hanesan, partisipante ida husi Kupaun-Indonézia, Mizaque Agostinho ba Ajénsia TATOLI informa katak durante prezensa iha Timor-Leste, hodi partisipa iha akampamentu PERMATIL ne’e sente konfortável, agradese no hato’o obrigadu wa’in tan aprende buat barak.
Nia mós rekoñese katak Timor-Leste ho Indonézia, nu’udar nasaun ne’ebé ketaketak maibé em termos kultura, ita iha ligasaun ne’ebé hanesan.
“Ami iha ne’e aprende língua; kolega sira hanorin no ami komprende kona-ba ‘amor’, ‘bom dia, boa tarde’ no seluk tan. Ida ne’e mak sai buat ne’e extra-ordináriu,” membru ida husi Komunitas Peacemaker Kupang-Indonézia ne’e haktuir.
“Konvida ami mai iha ne’e nu’udar meiu estabelese rede ida no kontinua forte hodi bele halo em termo de reforma agrarian, agrikultura, maibé alende ida ne’e, iha kontextu promove paz mundiál nian,” Partisipante Indonéziu, Mizaque Agostinho, reforsa tan.
Entretantu, durante atividade akampamentu la’ó envolve mós atividade semináriu sira. Entre semináriu ne’e, konvida mós Sekretáriu Estadu Komunikasaun Sosiál (SEKOMS), Merício Juvinal dos Reis “Akara” hodi sai mós oradór ida no ko’alia kona-ba Papel SEKOMS ba dezenvolvimentu komunikasaun iha Timor-Leste.
Iha semináriu ne’e entuziasmu partisipa husi juventude sira no iha mós sesaun husu no hatan kona-ba kestaun komunikasaun iha kontextu Timor-Leste, ligadu ho mídia, sibernetika nomós oinsa kria lei rádiudifuzaun (broadcasting law), ne’ebé lidera husi linguísta no poeta timoroan, Alexandra Tilman.
Jornalista : Rafy Belo
Editór : Manuel Pinto
