DILI, (TATOLI) – Prezidente Komisaun Funsaun Públika, Faustino Cardoso, hateten funsionáriu públiku hamutuk 116 sei termina destakamentu servisu iha Radiu Televizaun Timor-Leste, Empreza Públika (RTTL,EP) iha fim dezembru 2018.
Prezidente KFP hato’o polítika Governu ne’e hafoin enkontru ho Sekrétariu Estadu Komunikasaun Sosíal, Merício Juvenal dos Reis Akara, iha Palásiu Governu, ohin.
“Iha ámbitu ida ne’e Sekretáriu Estadu hato’o tempu badak funsionáriu sira sei konklui ho destakamentu, nune’e iha de’it ona funsionáriu ho rejime empreza públika iha RTTL,EP hodi evita dualismu rejime”, informa Prezidente KFP.
Komisaun prontu ezekuta desizaun governu hodi re-aloka funsionáriu públika ne’ebe durante tinan barak destakadu iha RTTL,EP ba instituisaun Estadu sira seluk.
Parte rua sei kontinua mantein komunikasaun no servisu hamutuk hodi re-aloka funsionáriu hirak ne’e tanba sei termina iha 31 dezembru 2018.
“ Ami mós sei halo enkontru ho RTTL,EP hodi enteira vizaun ba oin ne’e oinsá, liuliu liga ho funsionáriu destakadu”, realsa nia.
Tuir Prezidente KFP komisaun iha esperénsia hodi re-aloka funsionáriu públiku hosi instituisaun ida ba seluk hanesan antes akontese ona iha Ministériu Ekonomia no Dezenvolvimentu, Gabinete Primeiru-Ministru antes, Ministru Estadu Koordenadór Asuntu Sosiál.
Maibé Faustino garante instituisaun seluk sei simu funsionáriu hirak ne’e, tanba iha kapasidade no esperénsia tinan barak iha RTTL,EP. “Funsionáriu hirak ne’e iha kapasidade no esperénsia nomós governu investe maka’as ba sira”.
Nia informa tuir esplikasaun Sekretáriu Estadu termina destakamentu ne’e hodi dezenvolve RTTL,EP sai instituisaun profesionál, independensia, responsabilidade no hasa’e prestasaun servisu ho kualidade ba públiku.
Jornalista: Agapito dos Santos
Editora: Rita Almeida