Top

Veteranus La’ós Instrumentu Polítiku

Prezidente PD, Mariano Assanami Sabino, bainhira ezerse ninia direitu votu iha eskola primaria Bairru Pité, ohin. Foto Egas Cristovão

DILI (TATOLI)—Prezidente Partidu Demokrátiku (PD), Mariano Assanami Sabino alerta iha debate Orsamentu Jerál Estadu (OJE) 2019, ohin (17/12), dehan ; hahú ohin ba oin Timor-Leste tenke dignifika Veteranus, la’ós politiza fali.

“Ha’u hakarak ita Parlamentu Nasionál, ohin ba oin ne’e ita la iha politizasaun ba veteranus, ita fó medalla, fó onra ba sira, ne’e merese duni. Ba komisaun Omenajen ne’e la’ós patraun boot ida atu tuur para depois ema enxe formuláriu, buka tuir ita nia kuadru rezisténsia, para hatene,” Mariano Assanami Sabino fó hanoin iha plenária ohin.

Nia hatutan hahú ohin ba oin, Timor-Leste tenke fó dignu ba veteranus sira, labele utiliza beibeik veteranus sira para hamriik buka votus ba partidu sira. Utiliza veteranus sira kontra malu iha palku polítika nia leten, Ida ne’e; Labele akontese tan.

Nia kompara veteranus sira uluk luta ba libertasaun rai Timor nian tomak, sira (veteranus) sira nia luta la’ós hamriik iha partidu ida, tanba ne’e sira merese fó dignu ba sira.

Tanba ne’e; Partidu Demokrátiku ho konsensia tomak haree katak, presiza fó fatin dignu ba veteranus sira. La bele halo rezidénsia ketak-ketak ba sira, di’ak liu mak hadi’a sira nia uma iha sira nia rai leten ho dignu, ba feto faluk oan kiak, no ba veteranus sira ne’ebé mak sei moris. Ho ida ne’e, sira orgullu.

Sujere mós ba públiku sira atu la bele utiliza veteranus hodi kontra ema seluk nu’udar timoroan mós, pasadu ne’ebé povu ida ne’e hili la’ós sira nia hakarak, la’ós sira mak hakarak sai milísia, sai otonomista, no hansip, maibé povu ida ne’e tenke hili duni iha situasaun ida difisil.

“Frente klandestina ne’e, balun militár, balun HANSIP, malun funsionáriu Indonézia nian, ne’ebé ohin ba oin ne’e timoroan hotu iha direitu atu goja rai ida ne’e hanesan,” Assanami esplika

Iha fatin hanesan, deputadu Albina Marçal hosi CNRT, nu’udar veterana ida, rejeita katak; partidu ida politiza veteranus sira. Nia husu ba deputadu Mariano Assanami se iha evidénsia katak; partidu sira politiza veteranus sira, di’ak liu lori ba tribunal para hatán.

“Governu rekoñese hela veteranus hotu-hotu, la’ós ema ba politiza sira iha palku leten, maibé nu’udar veteranus no sidadaun iha direitu atu hili partidu ne’ebé mak nia hakarak, ha’u hanoin nein iha partidu ida politiza veteranu sira,” Deputadu Albina esklarese.

Entretantu durante ne’e estadu fó ona rekoñesementu ba veteranus sira ho meius, Kondekorasaun, pensaun no fasilidade saúde no edukasaun.

Deputadu CNRT Aderito Hugu, sujere ba Primeiru Ministru, atu harii konsellu veteranus, tanba lei iha ona. Objetivu harii konsellu veteranus mak bele hadi’ak veteranus nia moris ho dignu. Ba partisipasaun veteranus iha partidu ida ne’e, la’ós partidu mak uza sira, maibé tanba sira nia direitu polítiku ne’ebé mak konstituisaun mak fó.

Primeiru Ministru hatán ba deputadu sira nia prokupasaun kona ba harii uma ba veteranus, di’ak liu mak fó tan tempu ba governu atu haree no estuda didi’ak antes atu halo, tanba veteranus mós barak los.

“Ita fó ida tenke fó hotu, fó hotu ita nia kondisaun iha ka la’e ? e oinsá mak ita planeia di’ak. Ita fó ita rasik mós tenke hatene sustenta, se la hatene sustenta ne’e problema, tanba ne’e tinan oin ami haree didi’ak,” Primeiru Ministru, Taur Matan Ruak esplika.

 Ekipa Reportajen

Publisidade

Leave a Reply

Latest Post

error: Content is protected !!