DILI, (TATOLI) – Sekretáriu Estadu Ambiente (SEA) ho Autoridade Munsípiu Dili, ohin halo inspesaun konjunta dahuluk nian kona-ba jestaun lixu iha Dili laran, liuliu iha loja no supermerkadu tanba sira mak prodús fo’er barak liu no barak husi sira laiha kondisaun atu halo tratamentu iha sira-nia loja rasik.
SEA, Demétrio do Amaral de Carvalho, hatete inspesaun ida ne’e iha objetivu sosializa dekretu lei ijiene no orden públika, nune’e tenke aplika no presiza reforsa.
“Liuliu empreza, komersiante, loja, supermerkadu sira atu tau sira-nia fatin lixu tolu hodi halo segregasaun (haketak) lixu plástiku, kalén no besi aat sira, suratahan no matéria orgánika sira hamutuk, nune’e ajuda Munisípiu Dili nia serbisu rekolla lixu dadeersan mai rekolla karik loja sira bele ajuda deskarga sira-nia lixu di’ak liu no bele asegura mós sira-nia negósiu”, Demétrio dehan iha Rua Jacinto Candido, ohin.
Demétrio de Amaral de Carvalho, ho ninia ekipa halo inspesaun ba loja sira atu trata lixu ho didiak. Imajen Egas Cristovão
Liuhusi sosializasaun ne’ebé halo bainhira empreza sira ne’e lahalo tuir maka dekretu lei ijiene orden públika iha. Sé maka so’e lixu bele hetan sansaun dólar ida to’o rihun ida.
“Se nia so’e lixu ne’e fó moras ba ema seluk ita-nia kódigu penál hatete ne’e krime ambientál. Se ita mai fó hanoin sira lahalo tuir, to’o loron ruma ita karik entrega ba autoridade hodi halo prosesu”.
Eis deputadu ne’e hatete entidade komersiante maka prodús lixu boot liu no tuir peskiza hatudu sira ne’ebé rendimentu menus dólar 150 ne’e prodús lixu kilógrama hitu to’o sanulu loron ida, maibé loja boot sira ne’e besik tonelada.
“Entaun ita tenke enkoraja sira maka halo jestaun lixu di’ak uluk, nune’e mós ita fó hanoin ba umakain sira atu hatene organiza rasik sira-nia lixu, se bele bá so’e lixu iha tong sampah karik tau iha tong sampah nia laran. Se nakonu tiha ona karik ajuda komunika ho Munisípiu Dili hodi bá rekolla labele so‘e de’it iha li’ur”.
“Ita-nia maun-alin sira ne’ebé halibur lixu ne’e sira serbisu, ita so’e arbiru de’it fó todan ba sira, ba sira-nia saúde, sira-nia serbisu, ita tenke respeita sira”.
Ba Dili ida moos depende ba abitante, komersiante hotu iha Dili laran. Dili ida moos la’ós responsabilidade SEA nian, Munisípiu Dili nian, mas sidadaun hotu, tanba ne’e ba ema hotu nia liman Dili ida moos, Dili ida saudavel ba ema hotu nia moris di’ak.
Administradór Postu Adiministrativu Na’i-Feto, Tomas Alberto Braz, hatutan husi postu administrativu hasai tiha ona lei kona-ba ijiene orden no públika 33/2008 nian http://www.mj.gov.tl/jornal/?q=node/1341.
“Liuliu ba área iha Santa Krús ne’e husi Xefe Suku horisehik hasai ona sirkulár ida hato’o ba loja sira ne’e atu sira rasik maka halibur lixu no tula bá fatin ne’ebé determinadu”.
Bainhira ema sira lahalo tuir maka iha lei 33/2008 ne’e hakerek tiha ona no hela de’it atu implementa, maibé antes atu aplika ida ne’e tenke halo inspesaun no hanorin uluk tiha abitante sira komprende tiha ona maka bele tau iha implementasaun.
Iha inspesaun konjunta ne’e hahú husi loja sira iha Rua Liberdade Imprensa to’o Rua Jacinto Candido.
Jornalista: Maria Auxiliadora
Editora: Rita Almeida
