DILI, 25 abríl 2024 (TATOLI)–Governu liuhosi Sekretáriu Estadu Arte no Kultura (SEAK), Jorge Soares Cristovão, kuarta ne’e, asina ona nota intendimentu (MoU-sigla inglés) ho Governu Cuba, liuhosi Vise-Ministra Kultura, Lillitsy Hernández Oliva, hodi dezenvolve aréa kultura no rekursu umanu.
Jorge Soares Cristovão, hateten hosi kooperasaun ne’e maka iha tinan 2025, Timor-Leste no Cuba sei realiza programa interkámbiu kulturál hodi promove kulturál hosi nasaun rua ba futuru. “Interkámbiu ne’e sira (Cuba) bele mai Timor no ita bele bá Cuba,” Govenante ne’e relata liuhosi komunikadu imprensa ne’ebé maka TATOLI, I.P asesu kinta ne’e.
Notísia Relevante: SEAK prioriza dezenvolve no promove kultura-arte iha 2024
Nune’e mós tuir planu hosi Sekretáriu Estadu Arte no Kultura (SEAK) ba tinan 2024, sei haruka timoroan na’in neen to’o ualu atu bá estuda iha Institutu Superiór Arte (ISA) Cuba hodi hasai lisensiatura (S1) iha aréa arte no kultura hodi prepara rekursu umanu ba kriasaun indústria kulturál no mós kriasaun biblioteka nasionál Timor-Leste iha futuru.
“Parte rua asina memorandu intendimentu ne’ebe estabelese nune’e ba futuru sei kolabora no projetu hamutuk entre kultura Cuba no Timor-Leste,” Sekretáriu Estadu Arte no Kultura ne’e hateten.
Nia hatutan hafoin parte rua estabelese MoU ne’e, Governu liuhosi Sekretáriu Estadu Arte no Kultura (SEAK), Jorge Soares Cristovão, ho ekipa hala’o mós vizita bá Biblioteka Nasionál Cuba, hodi haree diretamente kona-ba ninia funsionamentu no operasaun servisu sira nune’e bele tulun Governu atu kria Biblioteka Nasionál Timor-Leste.
Iha serimonia asina MoU ne’e, hosi TL nian hetan akompanamentu hosi Embaixadór Timor-Leste ba Cuba, Nivio Leite Magalhães, Diretór Promosaun Kulturál SEAK, Felix Ximenes, Asesór Legál, Nidio Barros, no Sekretaria, Francisca Menezes, enkuantu hosi Cuba nian hetan akompaña hosi Diretora-Jerál Ensinu, Ariadna Padrón García, Reitór ISA, Rolando Ortega, no Ana Margarita Morejón, no mós Diretora RRII no Xefe Europea Ministériu kultura Cuba, Geober Guibert Pardo.
Notísia Relevante:Tinan ne’e, SEAK promete konstroi biblioteka nasionál
Ekipa TATOLI,I.P
