DILI, 02 Abríl 2024 (TATOLI) – Sekretáriu Estadu Arte no Kultura (SEAK), Jorge Cristovão, informa, tinan ne’e, Governu halo hahú prosesu konstrusaun ba Biblioteka Nasionál.
“Konstrusaun ba Biblioteka Nasionál ne’e iha tinan ida-ne’e ita hahú ona, tanba prosesu agora la’o hela, Biblioteka Nasionál ne’e ko’alia iha tinan 10-resin ba kotuk. Governu agora ida ne’e tenke halo esforsu atu realiza tiha ka halo konstrusaun,” Sekretáriu Estadu ne’e hatete ba jornalista sira iha Sentru Nasionál Chega (CNC-sigla portugés), tersa ne’e.
Notísia relevante:Empreza konstrutora Biblioteka Nasionál rezigna-aan
Nia dehan, Konstrusaun ba Biblioteka referidu ne’e hetan apoia hosi kompaña mina ho naran ENI no iha ona dalan atu konstroi iha tinan ne’e ba oin.
“Foin lalais ha’u simu mandatu, ha’u enkontru ona ho Diretór Empreza ENI nian, ha’u husu atu kontinua Biblioteka ne’e, ita hetan ona dalan no ita sei entrega ba Autoridade Nasionál Petroleu (ANP) mak halo nia prosesu aprovizionamentu, nune’e bele loke konkursu foun ba kompaña sira hotu atu aplika, ha’u garante katak tinan ne’e konstrusaun la’o ona,” nia kompromete.
Orsamentu ne’ebé prevee ba konstrusaun biblioteka nasionál hamutuk millaun $10,7 ne’ebé disponibiliza hosi empreza Eni ba Governu iha tinan 2009 bainhira sira sei halo hela perfurasaun mina iha kampu petrolífera KITAN, maibé daudaun la halo ona atividade nune’e ezekutivu sira tenke tau tiha osan ne’e hodi harii biblioteka nasionál.
Governu disponibiliza ona orsamentu adisionál millaun $2,3 ba faze dahuluk konstrusaun, diresionadu edifikasaun morru no supervizaun ba konstrusaun edifísiu.
Ba Konkursu ne’ebé loke ona antes ne’e empreza internasionál Sanghai Construction mak sai manán-na’in, maibé tanba hasoru difikuldade, nune’e empreza deside rezigna-an.
Bioblioteka nasionál sei harii iha área Hudi-laran, postu administrativu Dom Aleixo, munisípiu Dili, ho medida rai 27.000 m³, ne’ebé antes ne’e halo ona lansamentu fatuk dahuluk iha loron 16 agostu 2017 no halo serimónia hanesan iha loron 22 jullu 2022.
Notísia relevante:SEAK rekomenda ba Governu Dasiak kontinua obra biblioteka nasionál
Jornalista: Hortencio Sanchez
Editór : Florencio Miranda Ximenes
