DILI, 24 abríl 2024 (TATOLI)—Governu liuhusi reuniaun ordinária Konsellu Ministru (KM), kuarta ne’e, aprova votu kongratulasaun ba povu portugés ba aniversáriu revolusaun kravu (revolusaun ai-funan) 25 abríl 1975 ba da-50 no ba ezemplu konkista fali rekuperasaun liberdade no demokrasia nian ho pasífiku.
“Revolusaun Kravu ne’ebé koñesidu, aleinde halakon rejime ditatoriál no opresór iha Portugal, ajuda mós atu konsolida fundasaun ba Timor-Leste nia independénsia, hanesan Repúblika Demokrátika Timor-Leste, iha loron 28 novembru 1975,” Ministru Prezidénsia Konsellu Ministru ein ezersísiu, Adérito Hugo da Costa, relata hafoin reuniaun ezekutivu, iha Palásiu Governu.
Notísia relevante : PN aprova votu kongratulasaun ba komemorasaun Revolusaun Ai-funan ba da-50
Nia dehan, mehi ba liberdade no demokrasia povu portugés nian maka halo povu tomak Timor-Leste mehi no fiar katak liberdade, demokrasia no independénsia besik ona. Ohin, hanesan iha tinan 1974, Timor-Leste harii futuru ho fraternidade.
Tanba ne’e, Timor-Leste no ninia povu selebra hamutuk ho Portugal no povu portugés. Ho ida-ne’e, KM delibera mós hodi fó toleránsia pontu iha loron 25 abríl, durante loron tomak.
Jornalista : Antónia Gusmão
Editora : Julia Chatarina
