Top

DNMJPE Halo Treinamentu Ba Motorista Sira Atu Redús Despeza

DNMJPE, Ministériu Finansa (MF), ohin hahú treinamentu kona-ba manutensaun viatura ba motorista sira, ho intensaun redús despeza ba manutensaun nomós kombustivel. Imajen Egas Cristovão

DILI, (TATOLI) – Diresaun Nasionál Monitorizasaun Jestaun Patrimóniu Estadu (DNMJPE), Ministériu Finansa (MF) halo treinamentu kona-ba manutensaun viatura ba motorista sira, ho intensaun redús despeza ba manutensaun nomós kombustivel.

Diretora DNMJPE, Timotea P. Marques. Egas Cristovão

“Tinan ida ne’e ami mós hakarak fó atensaun ba motorista, aleinde lojístika nomós ba utilizadór sira seluk presiza fó koñesimentu kle’an ba sira oinsá halo manutensaun ba viatura Estadu”, afirma Diretora DNMJPE, Timotea P. Marques, iha Balide, ohin.

Treinamentu ne’e bazea ba avaliasaun DNMJPE ne’ebé halo ba liña ministeriál hotu, liuliu ba utilizasaun viatura Estadu nia hatudu katak despeza ba manutensaun no kombustivel kada tinan sempre aas.

Diretora DNMJPE hatete patrimóniu Estadu haree ba jestaun viatura Estadu no iha indikadór ida maka oinsá utiliza viatura sira ne’e maka alvu ida mak ba motorista sira atu fó koñesimentu báziku sobre regra utiliasaun, liuliu manutensaun tanba sira maka uza no oinsá hatene nia devér loroloron ba manutensaun preventiva, tanba bainhira sira iha koñesimentu maka sei kontribui ba redusaun despeza manutensaun ne’ebé sempre boot.

Liuhusi progama ida ne’ebé Partimóniu Estadu halo koordenasaun ho Diresaun Rodoviária nian oinsá maka bele fó hanoin filafali ba utilizadór sira (motorista), oinsá maka bele utiliza karreta tuir regra ne’ebé iha, tanba ne’e importante atu organiza treinamentu para kapasita tan sira.

“Depois ami fó sai konvite ba liña ministériu hotu ami hetan partisipante 300 resin no ida ne’e responde di’ak duni husi instituisaun sira hotu ne’ebé maka hakarak kolabora”, Timotea dehan.

Matéria ne’ebé sei fó iha atividade ne’e mak kona-ba regra utilizasaun viatura Estadu nian liga ba sansaun infrasaun ne’ebé dalaruma halo no regra ba tráfiku nian ne’ebé sei fó husi Diresaun Rodoviária nomós sobre jestaun viatura nian sei uza oinsá no mekániku báziku atu iha koñesimentu bainhira utiliza karreta Estadu nian, iha dalan maka hetan buat ruma no oinsá bele prevene ka foti asaun ruma.

Treinamentu ida ne’e hanesan faze dahuluk no sai hanesan regulár ida no sei iha faze tuirmai ne’ebé presiza atu sira hatene di’ak liután.

Hatán mekanizmu kontrolu ba viatura nian, Timotea dehan ne’e ministériu ida-idak hala’o jestaun rasik no devér Patrimóniu Estadu maka kapasita sira-nia lojístika oinsá fó asisténsia ba implementasaun jestaun ne’ebé iha no halo monitorizaun ba implementasaun ne’ebé halo.

Nia hatutan Patrimóniu Estadu iha 2017 halo avaliasaun no monitorizasaun ba liña ministeriál no instituisaun Estadu ne’ebé fornese ona treinamentu ba sira hamutuk 56 ne’ebé kapasita ona no halo ona avaliasaun no haree katak iha parte barak ne’ebé jestaun seidauk la’o ho di’ak, tanba ne’e presiza mellora tan no iha rekomendasaun lubuk ida oinsá atu hadi’ak.

“Iha nivel agregadu tanba iha ministériu 56 ne’e kuaze parte jestaun viatura ita haree tun no gastu barak, ita bele dehan katak gastu ba kustu manutensaun no kombustivel sei maka’as”.

Aleide ne’e Timotea mós relata dadus viatura Estadu nia iha 2018 hamutuk 3815 no ida ne’ebé di’ak hamutuk 3535 no aat 280.

Informa mós kona-ba leilaun ne’ebé halo iha faze da-11 iha 2017 ba karreta 228, motorizada 308, ai prendidu (ai sira ne’ebé floresta sira apreende ka foti no rai iha armazein floresta nian) no sasán sokata (sasán sira ne’ebé nia kondisaun lakompletu) iten 138 ne’e hatama ona reseita ba kofre Estadu hamutuk $1,015,360.91.

Enkuantu leilaun ba faze da-12 iha 2018 sei iha kontinuasaun pagamentu ne’ebé halo ona to’o dezembru mak $53,896.00.

Diretór Jerál Servisu Koorporativu, Martinho Lopes, hatete iha lansamentu ba avalizasaun no monitorizasaun (horisehik) ba patrimóniu Estadu iha komponente tolu maka dixiplina rejistu patrimóniu Estadu, jestaun inventária no uza viatura hatudu momoos katak uzu viatura Estadu nia valór ki’ik liu no ida ne’e indika menus koñesimentu.

Tanba ne’e Ministériu Finansa esforsu nafatin oinsá atu mellora motorista sira-nia koñesimentu no oinsá atu redús despeza.

Jornalista: Maria Auxiliadora

Editora: Rita Almeida 

Publisidade

Leave a Reply

Latest Post

error: Content is protected !!