DILI, (TATOLI) – Sekretáriu Estadu Kooperativa (SEK), Arsenio Pereira da Silva, hafoin hasoru Primeiru-Ministru, Taur Matan Ruak, iha Palásiu Governu, ohin, hateten SEK nia programa prioridade ba oin mak haree kooperativa produsaun.
“Ami mai hasoru malu ho Xefe Governu, hanesan sorumutu informál atu update servisu ne’ebé durante ne’e la’o no ba oin sei prioritiza ba kooperativa produsaun”, dehan nia ba Tatoli.
SEK hatutan kooperativa produsaun maka sai foku ba implementasaun ba oin, maske tuir dekretu lei númeru 16/2004 mensiona kona-ba ramu kooperativa ne’ebé barak maibé governu da-ualu nia programa maka oinsá bele haree kooperativa produsaun.
Tanba ne’e maka Primeiru Ministru enkoraza SEK atu halo servisu di’ak no enfatiza nafatin joven sira hodi servisu hamutuk ho inan aman sira iha área rurál hodi bele dezenvolve kooperativa sira.
Enkuantu, iha tinan kotuk mezmu tempu badak maibé SEK konsege kobre munisípiu hotu atu hatene direitamente difikuldade komunidade nian iha área rurál.
Ho baze ida ne’e maka halo SEK bele implementa planu asaun 2019, ho ajusta ba programa governu nian, inkui referénsia hosi planu estratéjiku dezenvolvimentu nasionál.
Jornalista: Zezito Silva
Editora: Rita Almeida
