DILI, (TATOLI) – Embaixadór Kanada iha Timor-Leste, Peter Mac Arthur, hateten Kanada iha kompromete apoiu Timor-Leste iha área mina no gás.
“Ba oin, Kanada iha kompromisu fó apoiu ba dezenvolvimentu Timor-Leste nian iha setór petroleu no gás”, Embaixadór Kanada ba jornalista sira hafoin hasoru Primeiru-Ministru, Taur Matan Ruak, iha Palásiu Governu, ohin.
Nia dehan petróleu no gás sai área importante ba dezenvolvimentu Timor-Leste, tanba ne’e Kanada iha interese hodi hasoru Xefe Governu ho objetivu kontribui ba prosesu dezenvolvimentu mina no gás Timor-Leste nian.
Enkuantu, enkontru entre Embaixadór Kanada ho Xefe Ezekutivu, hakle’an liután kona-ba kooperasaun bilaterál iha setór ekonomia no seguransa.
Entretantu, antes ne’e Kanada ho Timor-Leste halo ona kooperasaun liuhosi setór seguransa inklui oinsá hakbiit feto sira partisipa iha dezenvolvimentu nasionál.
Jornalista: Zezito Silva
Editora: Rita Almeida
