DÍLI, (TATOLI)-Diretór Sentru Estudu ba Paz, Universidade Nasionál Timor Lorosa’e (UNTL), Antero Benedito da Silva, fo sasin katak, lider nasionál, formadór estadu sira ho kombatente luta nian uza mós métodu sientífiku, edukasaun, saúde, promosaun luta naun-antagonístiku atu konkista independénsia.
Antero Benedito da Silva, hateten lia hirak ne’e bainhira sai oradór ba seminariu nasionál, ohin, iha Kampus Liceu, UNTL, Dili, hodi komemora loron nasionál veteranu ba dala-38. Seminariu ne’e rasik ho tópiku “Transformasaun Valór Rezisténsia Ba Dezenvolvimentu Nasionál”.
“Ita-nia lider, formadór estadu sira, kombatente luta nian uza mós métodu sientífiku, edukasaun, saúde, promosaun luta naun-antagonístiku atu konkista indepedénsia. Ne’e nesesáriu atu diskute, debate valór rezisténsia sira nian”, hateten Profesór Antero Benedito ba profisionál komunikasaun sosiál sira.
Profesór universitáriu ne’e esplika mós katak marxista, komunista katak parte ida husi artikulasaun kona-ba prosesu evolusaun istória umana. Ne’e pensamentu husi sosiologu Karl Max husi Alemaña, iha ne’ebé argumenta katak sosiedade evolui no halo parte iha parte seluk.
“Komunizmu ne’e finál ida husi prosesu evolusaun sosiedade iha mundu tomak. Ida ne’e pozisaun Karl Max nian. Iha mós prosesu liuhusi sistema feodalizmu, kapitalizmu, depois evolui ba komunizmu. Entaun, la’ós sosiedade ohin loron maibé sosiedade iha pensamentu ideál ba nia, ba futuru sosiedade”, konsidera akadémiku UNTL ne’e.
Iha okaziaun ne’e, Diretór Antero Benedito da Silva fó mensajen ba estudante no joven sira atu intende prosesu luta Timor-Leste nian. Katak, ita-nia luta ne’e iha dimensaun antagonizmu, violentu tanba impozisaun funu husi invazór, militár indonézia sira nian.
“Maibé nesesáriu mós kultiva parte seluk husi ita-nia luta; luta la ho violénsia, luta ho lapizeira, ho matenek, artikulasaun sientífika liuhusi métodu edukasaun, pedagójiku hodi eduka ita-nia povu atu kombate ho inimigu ho siénsia, argumentu no ho diplomásia. Tanba ne’e, ita konsege alkansa objetivu husi ita-nia luta, ohin sai nasaun independente”, hateten Profesór Antero.
Iha fatin hanesan, Reitór UNTL, Francisco Miguel Martins ba jornalista sira katak semináriu nasionál ne’e organiza husi Sentru Estudu ba Jéneru hodi lori palestrante importante sira hanesan Padre Martinho Gusmão nomós Profesór Antero Bendito, ne’ebé la’ós akadémiku de’it mós rezistente, para fó kontribuisaun iha tópiku ne’ebé elabora husi Sentru Estudu Jéneru, inklui mós reitór rasik.
Akadémiku UNTL ne’e mós esplika katak semináriu ne’e, UNTL nu’udar instituisaun akadémika, sientífika tenke enkoraja nafatin foinsa’e sira atu tane valór rezisténsia para joven sira ne’ebé futuru lideransa, sai sujeitu ba prosesu dezenvolvimentu intende saida mak istória rezisténsia? Luta ne’e oinsá? Iha Prosesu dezenvolvimentu ne’e sá mak sei foti nu’udar bukae ida para ita kaer metin hodi ita hala’o serbisu forte ba ita-nia prosesu dezenvolvimentu nasionál hodi evita buat ladi’ak sira ne’ebé, purezemplu, ba oin.
“Buat ne’ebé la di’ak ita evita, buat di’ak ita enkoraja,” saliente Reitór Universidade Nasionál Timor Lorosa’e, Francisco Miguel Martins, perante jornalista sira.
Partisipa iha semináriu nasionál ne’e, alende estudante universitáriu husi instituisaun akadémika UNTL husi fakuldade no departamentu oioin, inklui mós estrutura makro no mikro balun ne’ebé eziste iha estabelesimentu ensinu públiku ne’e.
Jornalista: Rafy Belo
Editór: Francisco Simões
