DILI, (TATOLI) – Ministru Obra Públika, Salvadór Soares dos Reis Pires, hatete governu sei halo estudu viabilidade atu muda komunidade ne’ebé hela besik estrada ninin, hosi rotunda Komoro to’o Tasitolu, nune’e governu bele haluan estrada.
“Governu sei iha estudu viabilidade, ita sei halo sensibilizasaun no fó indeminizasaun, no ita nia ekipa halo hela, tinan ne’e ita halo estudu ne’ebé viavel ba ema ne’ebé afeta hosi programa”, dehan governante ne’e ba jornalista sira hafoin hasoru Xefe Governu, Taur Matan Ruak, iha Palásiu Governu, ohin.
Nia afirma atu halo asaun ida ne’e governu tenke foti solusaun ne’ebé signifikativu, se muda ema maibé la rezolve problema, ida ne’e la di’ak, nune’e maka governu tenke fornese kondisaun mínimu atu ema kontinua moris ho dignu hodi hala’o sira nia atividade diária.
“Kuandu governu halo, tenke haree hosi impaktu sosiu-ekonómiku, avaliasaun kona-ba propriedade”, katak.
Governu iha ona dadus kompletu no konkretu hodi halo intervensaun ne’ebé signifikante, enkuantu área hirak ne’e tama iha planu dezenvolvimentu.
Enkuantu, tuir dadus ne’ebé iha, governu sei muda komunidade iha estrada ninin Rotunda Komoro to’o Tasitolu hamutuk uma kain 200, nune’e governu loke luan estrada.
Alende ne’e Ministru Obra Públika iha ámbitu hasoru malu ho Primeiru-Ministru, informa mós kona-ba inundasaun ne’ebé akontese foin daudaun, nune’e hosi parte Obra Públika, Sekretáriu Estadu Meiu Ambiente no Ministériu Estatál sei halo esforsu hodi rezolve inundasaun ne’ebé maka akontese.
Jornalista: Zezito Silva
Editora: Rita Almeida
