INAP ho GPM Halibur Hanoin Ba Konseitu Kualidade Lideransa

DILI,(TATOLI)-Instituto Nasionál Administrasaun Públiku (INAP) ho Gabinete Primeiru Ministru (GPM), ohin, realiza semináriu nasionál ida hodi halibur hanoin atu dezenvolve konseitu ba sasukat kualidade lideransa.
Semináriu ne’ebé hala’o iha Salaun Ministériu Finansa (MF) ne’e buka esplora mós hanoin atu kria sertifikasaun ba kompeténsia lideransa ba kargu xefia liuhusi formasaun lideransa hodi hadi’a serbisu administrasaun públika.
Semináriu Nasionál ne’e ho tema “Estratéjia Dezenvolvimentu no Sertifikasaun Kompeténsia Lideransa atu Responde Polítika Reforma Administrasaun Públiku” no aprejenta orador internasionál nain rua (2) núdar partu; na’in ida husi Japaun mak Hirono, no ida seluk mai husi Indonézia mak Doutór Mahmud Prianto.
Orador nasionál sira, kompostu husi Ministru Negósiu Estranjeiru no Kooperasaun, Deonísio Babo, membru Parlamentu Nasional (PN) husi Bankada Fretilín, Francisco Miranda Branco, Eis Ministru Agrikultura no Peskas atuál membru PN husi Bankada PD, Mariano Assanami Sabino, Vise Ministra Sosial no Inkluzaun Signi Candrawati Verdial, Provedora Direitus Umanus no Justisa (PDHJ-siglaPortugés), Jejuina Maria Fereira Gomes , ho eis Ministru Negósiu Estranjeiru no eis Reitór UNTL, Aurelio Guterres.
“Ideas no rekomendasaun husi partisipante sira sei sai konsiderasaun ba INAP atu dezenvolve estratéjia ba formasaun lideransa iha administrasaun públiku”, hateten Diretór Jerál INAP, Agostinho Letencio de Deus.
Nia hatutan katak, rekursu umanu kualifikadu maka sai nu’udar fatór prinsipál ba kondisaun absoluta instituisaun hodi hala’o ninia kna’ar atu atinje ninia objetivu.
Iha biban hanesan, Ministru reforma Lejizlativa no asuntu Parlamentár, Fidelis Manuel Leitê Magalhães hatete, INAP nudár instutu importante tanba papél xave atu hadi’a kualidade ba kuadru lideransa ne’ebé iha administrasaun públika.
“Nasaun ida bainhira atu lao ba oin bainhira ninia funsionalizmu públiku ne’e matenek, iha kapasidade intelektuál, jestaun no kapasidade lideransa atu hasoru dezafiu ne’ebé maka sei mosu iha prosesu dezenvolvimentu”, Ministru Fidelis Magalhães hateten.
Embaixadór Japaun ba Timor Leste, Hirosi Minami iha ninia intervensaun hatete, rekursu umanu importante atu dezenvolve nasaun tanba nu’udar nasaun foun presiza rekrusu umanu kualifikadu.
Nia sujere atu Timor-Leste mós presiza aprende esperiénsia kona-ba reforma administrasaun públika husi nasaun sira seluk hodi hadi’a liután administrasaun públika nasaun nian ida forte ba apoiu prosesu dezenvolvimentu.
Polítika reforma administrasaun públika, nudár esforsu ne’ebé Governu kontinua halo ho objetivu atu hadi’a efikásia, efisiénsia no profisionalizmu iha asaun administrasaun públika ba modernizasaun no implementasaun medida governasaun di’ak, hadi’a lideransa, jestaun no kapasidade dezempeñu, transparénsia no responsabilizasaun ba prestasaun serbisu públiku.
Iha dekretu lei lei nú 5 /2016 rejime ba kargu xefia administrasaun públiku artigu 5.2 mós define polítika formasaun lideransa ba kargu xefia liuhusi formasaun iha administrasaun públiku.
Jornalista: Agapito dos Santos
Editór: Francisco Simões

