Australia Disponivel Ona Ratifika Tratadu Fronteira Marítima

DILI, 29 maiu 2019 (TATOLI)-Governu Australia iha ona disponibilidade atu hamutuk ho Parlamentu Nasionál Timor-Leste ratifika tratadu fronteira marítima.
“Kontaktu ikus ho Embaixadór Australia iha ona disponivel atu ratifika tratadu fronteira marítima iha tempu badak,” informa Prezidente Parlamentu Nasionál, Arão Noe de Jesus Amaral, ba jornalista sira hafoin relata servisu parlamentu nian ba Prezidente Repúblika, Francisco Guterres Lu Olo, ohin, iha Palásiu Prezidensiál, Bairru-Pité Dili.
Arão Noe hateten, Timor-Leste tenke aproveita disponibilidade governu Australia ne’e hodi prepara lejizlasaun sira tanba depois ratifika, automatikamente área Bayu Undang tama ona iha área jurisdisaun Timor-Leste.
“Aplika impostu iha área Bayu Undang tenke aplika hosi Timor-Leste, entaun ita tenke ajusta ita ninia lejizlasaun para bele kobre area sira ne’e,” tenik Arão Noe.
Prezidente Parlamentu hein katak, governu bele aprova tan dekretu lei balun no lei tributária no seluk tan hodi suporta Parlamentu hodi ratifika ona asuntu ne’e.
“Ita hein katak governu aprova ona dekretu lei balun no presiza karik parlamentu nia apoiu ba alterasaun lei tributária, parlamentu prontu atu halo alterasaun ba lei sira ne’e antes ita ratifika,” afirma Arão Noe de Jesus Amaral.
Jornalista : Agapito dos Santos
Editór : Francisco Simões

