16 jullu 2019 (TATOLI)- Associação dos Pais Estudante Ensinu Sekundária Jerál 5 de Maio voluntariamente kontribui konstrui sala de aula ida no oferese komputadór 30 kompleta ho nia aparellu sira ba estabelesimentu ensinu 5 de Maio, Becora, Dili.
Tanba ne´e, Ministra Edukasaun, Juventude no Desportu (MEJD), Dulce de Jesus Soares apresia inan-aman sira ne’ebé hatudu ona interese hodi konstrui sala aula ida ba matéria multimedia ne´e.
“Ha’u mai inagaura sala ida iha eskola sekundária 5 de Maio ne’e tanba hetan kontribuisaun husi inan aman sira nian ne’ebé kompleta ho komputadór inklui aparellu para eskola ne’e bele utiliza nu´udar materiál multimedia,” hateten Ministra Dulce de Jesus Soares iha Eskola 5 de Maio Becora, Dili, tersa (16/07/2019)
Ministra Dulce hateten, Oitavu Governu Konstitusionál agradese, apresia no orgullu ba inan aman sira maske ho kbi’it natoon sira hakarak kontribui hodi realiza planu eskola 5 de maio nian. Ida ne’e tanba koordenasaun di´ak entre eskola ho Assossiação dos Pais no profesór sira.
Ministra dehan, maske orsamentu la bo’ot ho montante rihun 16 de’it maibé konsege konklui ona sala ida inklui komputadór 30. Hahalok sira hanesan ne’e ministériu konsidera duni tanba planu ka programa VIII governu nian fó duni oportunidade ba komunidade sira atu envolve iha prosesu konstrusaun eskola.
“Ministériu kontinua enkoraja komunidade atu bele fó kontribuisaun la´ós materiál de’it maibé kooperasaun liuhusi sira-nia atensaun ba prosesu eskola nian,” tenik governante ne´e.
Iha fatin hanesan, Diretór Eskola 5 de Maio Becora, Manuel Verdial hateten, apoiu ne’ebé mak inan aman sira ajuda ne’e tanba interese ba planu ne’ebé mak parte eskola trasa tiha ona. Tanba durante ne’e Eskola 5 de Maio iha teória kona-ba matéria multimedia maibé laiha sala de aula atu halo prátika. “Tan ne’e liuhusi enkontru ne’ebé realiza ho Associação dos pais no profesór, hothotu apoiu. Entaun kontribuisaun orsamentu rihun 16 ne’e konsege realiza duni mehi ne’ebé iha”.
Profesór ne´e afirma katak durante ne’e laiha proposta ida mak sira hatama ba governu tanba konsidera Ministériu Edukasaun la´ós tau-matan de’it ba Eskola 5 de Maio maibé ba eskola hotu iha Timor-Leste.
“Portantu orsamentu ne’ebé mak eskola hetan husi inan aman sira ne’e la´ós liuhusi kobransa maibé kontribuisaun dolár ida kada fulan durante tinan ida resin,” konklui Diretór Eskola 5 de Maio, Manuel Verdial.
Jornalista : Tomé Amado
Editór : Rafy Belo
