DILI, 25 jullu 2019 (TATOLI)-Governu liuhosi Ministériu Obra Públika (MOP) prioritiza suku hamutuk 67 iha Timór laran ne’ebé seidauk asesu ba eletrisidade, liuliu suku ne’ebé besik liña elétrika ezistente.
“Ita prioritiza fazeadamente atu kompleta suku 67 ne’ebé seidauk asesu enerjia eletrisidade”, Ministru MOP ba Ajénsia Tatoli iha nia servisu fatin, Kaikoli, ohin.
Ministru Salvador hatutan MOP hahú halo levantamentu dadus, inklui dezeñu, nune’e bá oin prioritiza ho fazeadamente ba suku ne’ebé sei nakukun ho porsentu 17.
Enkuantu, programa eletrifikasaun rurál iha 2019, prevee millaun $1, hodi halo identifikasaun ba área hirak ne’ebé izoladu ho jeografikamente ne’ebé halo ligasaun fíziku ba distribuisaun liña elétrika.
Iha tinan ne’e, ministériu hahú halo levantamentu dadus no dezeñu projetu pakote suku 33, atu implementa iha 2020 no pakote 32 sei hala’o iha 2021, enkuantu pakote 9 sei realiza iha 2022.
Jornalista : Florêncio Miranda Ximenes
Editora : Maria Auxiliadora
