PM Taur Orienta MAE ba Haree Suku Leorema

DILI, 23 jullu 2019 (TATOLI)-Primeiru-Ministru (PM), Taur Matan Ruak, fó orientasaun ba Ministru Administrasaun Estatál ein-Ezersísiu, Abílio José Caetano, atu tuun ba tuur hamutuk ho autoridade lokál iha Suku Leorema, Postu Administrativu Bazartete, Munisípiu Liquiça, hodi rezolve funsionamentu administrasaun Suku Leorema nian.

Abílio José Caetano, ba Ajénsia TATOLI, ohin, iha ninia servisu fatin, Caicoli, Dili, hatete, orientasaun ne’e hodi haree funsionamentu servisu administrasaun suku refere relasiona ho kazu omisida foin lalais hodi rezulta juventude na’in rua mate, tolu kanek, sunu uma 13, inklui lori trauma boot ba komunidade lubun ne’ebé evakua ba Liquiça villa.
Nia dehan, governu seidauk adianta desizaun kona-ba substituisaun xefe suku ida ne’ebé deskonfia envolve iha kazu omisídiu Suku Leorema hodi hein desizaun ikus hosi Tribunal.
“Daudaun ne’e ita hein de’it tanba kazu ne’e iha tiha ona tribunal entaun bainhira mak tribunal deside ona katak nia sala entaun ita sei hili fali ema seluk atu bele halo servisu suku nian,” hateten Abílio José Caetano.
Notísia Relevante : Líder Komunitária Suku Leorema La Funsiona Ho Di’ak
Konfrontu Leorema Kontinua, Sunu Tan Uma 13 ho Motór Hitu
Jornalista : Osória A. Marques
Editór : Francisco Simões

