DILI, 25 jullu 2019 (TATOLI)-Ministériu Turizmu, Komérsiu no Indústria (MTKI) sei loke feira loraik iha Kristu Rei hodi komemora loron konsulta populár 30 Agostu no misaun INTERFET (Forsa Internasionál ba Timor-Leste) ba-dala 20 iha Timor-Leste.
Diretór Jerál Turizmu MTKI, José Filipe Dias Quintas, informa programa turizmu nia atu loke feira loraik ne’e, sei realiza iha setembru to’o outubru tinan ne’e.
Molok to’o iha feira ne’e, MTKI liuhusi Diresaun Sesaun Programasaun sei hala’o uluk atividade demonstrasaun ba artezanatu, suru-tais, kompetisaun kulinária ba hahán lokál no dansa kulturál iha Sentru Konvensaun Dili.
“Hahú husi loron 25 to’o 29 agostu”, Diretór Jerál Turizmu ba Ajénsia Tatoli iha Ministériu Finansa Aitarak-Laran, ohin.
Koba-ba feira loraik iha Kristu Rei, sei loke kada sesta, tuku 5 to’o tuku 10 kalan, ne’ebé sei prepara mós hahán furak ka produtu lokál hodi promove gastronomia Timor-Leste nian, artezanatu oioin ho kualidade di’ak no mós aprezentasaun dansa kulturál ne’ebé furak.
Inisiativa loke feira iha área Kristu Rei ne’e, Diretór Jerál ne’e dehan, aliña hotu ba selebrasaun loron 30 agostu tanba área Kristu Rei hanesan fatin koñesidu ne’ebé presiza tebes atu promove ho di’ak liután.
“Susesu ba feira ne’e, konta ho servisu hamutuk entre Diresaun Nasionál Turizmu, Sekretáriu Estadu Arte no Kultura, Polísia Nasionál Timor-Leste, Diresaun Nasionál Transporte no Telekomunikasaun no Seguransa Sivíl”, Quintas afirma.
Jornalista: Florêncio Miranda
Editora : Maria Auxiliadora
