DILI, 26 jullu 2019 (TATOLI)-Parlamentu Nasionál (PN) sei diskute no aprova fila fali proposta lei protesaun labarik ho artigu 100 resin ne’ebé antes ne’e kaduka ona iha Kuarta Lejislatura.
Komisária Komisaun Nasionál Direitu ba Labarik (KNDL), Dinorah Granadeiro, informa katak, liuhosi rezultadu diskusaun ho Komisaun F PN ne’ebé trata asuntu Edukasaun no Saúde, rezulta katak, KNDL presiza halo revizaun ba artigu balun molok submete ba plenária PN hodi halo diskusaun.
“Iha semana hirak liu ba ami ho komisaun F iha PN diskute oinsá hodi haree progresu hosi lei ne’e rasik,” dehan Komisária ba Komisaun Nasionál Diretu Labarik, Dinorah Granadeiro, ohin, ba Ajénsia TATOLI iha ninia servisu fatin, KNDL, Caicoli, Dili.
Dinorah Granadeiro, hateten, razaun ba KDL atu halo revizaun ne’e tanba nota artigu balun ko’alia ein-jerál no la espesífiku atu fó protesaun di’ak ba diretu labarik sira nian.
Entretantu, tuir Komisaun F PN nian hakarak katak, protesaun ne’e tenke hahú hosi labarik ho idade tinan 0 to’o tinan 18.
“Konseitu lei protesaun labarik ne’ebé iha fó de’it protesaun ba labarik sira ne’ebé mak iha situasaun difisil,” informa Dinorah Granadeiro.
Jornalista : Nelson de Sousa
Editór : Francisco Simões
