DILI, 05 agostu 2019 (TATOLI)-Igreja Katólika no Governu hahú enkontru hodi estabelese ekipa atu diskute kona-ba akordu entre Timor-Leste ho Santa Sé.
Estadu Timor-Leste estabelese konkordata ho Santa Sé iha loron 14 agostu 2015, ne’ebé ko’alia kona-ba dezenvolvimentu iha Timor-Leste liuliu asuntu edukasaun.
“Ohin ami enkontru préviu ida, ne’ebé Primeiru-Ministru maka husu tanba Don Norberto hanesan prezidente konferénsia episkopál haruka karta ba Primeiru-Ministru atu husu estabelese ekipa bilaterál ida ne’ebé bele diskute asuntu sira konkordata nian, entaun ne’e enkontru dahuluk ne’ebé halo atu haree mekanizmu oinsá atu estabelese ekipa”, dehan Padre Vigáriu Dioseze Dili, Juvito do Rego, hafoin partisipa enkontru iha Palásiu Governu, ohin.
Padre Juvito do Rego dehan, atu estabelese ekipa ne’e tenke liuhosi dekretu Governu ne’ebé mai hosi xefe Governu hodi estabelese ministériu ida hodi reprezenta Governu nian iha ekipa refere.
Tanba tuir Vigáriu Dioseze Dili ne’e katak iha 2016 kuandu hahú enkontru bilaterál ida, Ministériu Negósiu Estranjeiru no Kooperasaun maka asume responsabilidade hanesan intermediáriu Governu nian atu ko’alia ho ekipa hosi igreja nian.
“Haree ba asuntu sira iha konkordata ne’ebé Governu asina ho Santa Sé ne’e asuntu barak maka seidauk implementa. Foin maka ida de’it ne’ebé prevee iha artigu 1, iha akordu konkordata ne’ebé asina iha loron 14 agostu 2015 ne’ebé ko’alia kona-ba dotasaun ida ne’ebé Governu fó ba igreja tuir posibilidade Governu nian”.
“Maibé asuntu sira seluk kona-ba matrimóniu, terras e propriedades, edukasaun, injensaun ba taxa, vistu ba misionáriu, loron nasionál igreja, no ensinu relijiaun kona mós ba lei hanesan amu lulik sira halo krime karik oinsá atu rezolve, ne’ebé buat sira ne’e tenke estabelese hotu iha akordu tuirmai, más presiza ekipa ida atu servisu intensivamente atu halo, no tenke hahú ona, tanba hahú iha tinan 2016 foin implementa artigu 11 de’it”, haktuir padre Juvito.
Enkontru préviu ne’e lidera hosi Ministru Prezidénsia Konsellu Ministru, Agio Pereira, akompaña mós hosi Ministra Finansa Interina, Sara Lobo Brites, no partisipa hosi misionáriu sira.
Notísia relevante : Igreja no Governu Sei Forma Ekipa Diskute Konkordata Santa Sé
Jornalista : Antónia Gusmão
Editora : Maria Auxiliadora
