DILI, 5 agostu 2019 (TATOLI)—Parlamentu Nasionál (PN) lakohi halo espekulasaun ba orsamentu atu dada Kadoras mai Timor-Leste, tanba prosesu ne’e seidauk to’o.
“Ita seidauk halo espekulasaun ba asuntu ida ne’e, tanba asuntu xave hanesan troka nota entre Timor-Leste no Austrália seidauk ho mós promulgasaun lei sira. Orsamentu ne’e ha’u seidauk bele ko’alia,” Prezidente Parlamentu Nasionál Interina, Maria Angelina Sarmento, ba jornalista sira, iha PN, segunda ne’e.
Lee mós:
Orsamentu Dezenvolve Kadoras iha Futuru Kestionável
AMP Husu Timoroan Hotu Apoiu TIMOR GAP Hodi Dada Kadoras Mai Beaço
Nia konsidera katak prosesu dezenvolvimentu ba Greater Sunrise hanesan faze foun, tanba ratifikasaun Tratadu Fronteira Marítima seidauk promulgadu.
“Hafoin troka nota mak ita fó kna’ar tomak ba Governu atu halo nia planu, oinsá mak Timor GAP bele realiza investimentu iha kosta-súl kona-ba dada kadoras mai Timor-Leste,” nia argumenta.
Nia ko’alia asuntu ne’e, tanba antes ne’e, Sekretáriu Jerál FRETILIN, Marí Alkatiri, preokupa maka’as osan atu dezenvolve kadoras, tanba atu dada kadoras mai Timor-Leste, presiza orsamentu billaun $16 to’o $18.
Tanba ne’e, Maria Angelina, dehan prosesu ne’e hahú ko’alia hafoin Tratadu Fronteira Marítima entre Timor-Leste ho Austrália vigora ona.
Jornalista: Evaristo Soares Martins
Editór: Xisto Freitas
