DILI, 05 agostu 2019 (TATOLI)– Rede Defensór Direitu Umanu (RDDU), apresia Governu tanba apoia negosiante ambulante iha Largo Lesidere atu kontinua nia negósiu.
Portavós RDDU, Adélio da Costa Fernandes, apresia Governu liuhosi liña ministeriál hanesan Ministériu Turizmu, Komérsiu no Indústria (MTKI), Ministériu Estatál no Polísia Nasionál Timor-Leste (PNTL) no Autoridade Munisipiu Dili tanba apoiu negosiante ambulante iha Largo Lesidere atu kontinua negósiu iha fatin refere.
“Ami apresia tanba Governu fó ona lona ba negosiante ambulante sira atu kontinua hala’o negósiu iha Largo Lesidere no agradese ba PDHJ tanba fasilita ona diskusaun ne’e”, Portavós RDDU iha edifísiu Provedoria Direitu Umanu no Justisa (PDHJ) Kaikoli, ohin.
Nia dehan, hahú husi 2018 to’o 2019 rejista ona vendedór ambulante iha Largo Lesidere hamutuk 93 kompostu husi fa’an nuu, fa’an nesesidade bázika, nasi goreng no seluk tan.
Iha fatin hanesan, Portavós Negosiante Ambulante Largo Lesidere, Joana dos Reis, dehan sira dada ona lona no autoridade munisípiu Dili fó lisensa atu kontinua fa’an iha fatin refere.
“Ami kontinua asegura Largo Lesidere atu moos husi lixu, maibé Autoridade Munisípiu tenke monta seguransa iha fatin ne’ebá”, Portavós ne’e husu.
Adjuntu PDHJ, Miguel Pereira de Carvalho, husu ba autoridade Estatál no seguransa atu trata negosiante ambulante sira ho dignu.
“Ami hala’o mediasaun tanba simu keixa husi portavós vendedór ambulante iha loron 10 jullu 2019 katak iha terrenu uza forsa hasoru vendedór ambulante ne’ebé balun lakon sira-nia sasán,” katak.
Xefe Departamentu Jestaun Munisípiu Dili, Berta Santa Gonçalves Vieira, dehan daudaun ne’e munisípiu Dili fasilita de’it negosiante sira atu kontinua negósiu iha Largo Lesidere, maibé tenke garante hamoos lixu.
“Agora ne’e mak ita fasilita, maibé atu dehan imi (hela permanente ou lae) ne’e desizaun Governu nian”, katak.
Jornalista: Florencio Miranda Ximenes
Editora : Maria Auxiliadora
