DILI, 21 agostu 2019 (TATOLI)-Indonézia liuhusi KBRI (Kedutaan Besar Republik Indonesia) realiza resepsaun diplomátika iha ámbitu komemorasaun aniversáriu proklamasaun ba dala 74 ho atividade hanesan Fashion Show, hatudu kultura hosi Batak, Java, Manado, Flores, Sumba, no aprezenta dansa tradisionál Indonézia nian husi Minahasa, Sulawesi oeste no mós aprezentasaun fashion show aprezenta direta husi espoza embaixadór KBRI, no ibu-ibu darma wanita, KBRI, iha mós koru.
Kanta abertura serimónia resepsaun diplomátika ho múzika ne’e hahú ho inu nasionál Timor-Leste, Pátria Pátria no inu nasionál Indonézia nian, Indonesia Raya.
Resepsaun diplomátika ne’e lidera hosi Embaixadór RI ba Timor-Leste, Sahat Sitorus. Resepasaun ne’e partisipa husi korpu diplomátiku, parseiru dezenvolvimentu sira, Eis-lider UNAMET (United Nation Mission in East Timor), Ian Martin, inklui Ministru Negósiu Estranjeiru no Kooperasaun Timor-Leste, Dionísio Babo Soares.
Dionísio da Costa Babo Soares.Imajen/Antonio Goncalves
“Relasaun Timor ho Indonézia di’ak tebetebes iha setór hotu-hotu, liuliu iha setór edukasaun, agrikultura, ekonomia no kultura,” hateten diplomata timoroan, Dionísio Babo Soares, bainhira hato’o nia diskursu iha serimónia resepsaun diplomátika aniversáriu RI ba 74 ne’e.
Enkuantu, Ministru Dionísio Babo Soares iha entrevista ho jornalista sira informa katak nia prezensa iha resepsaun ne’e reprezenta governu hodi hato’o mensajen sobre relasaun entre Timor-Leste ho Indonézia. “Bele fó mós parábens ba sira-nia nasaun, agora komemora 74 anos,” hateten governante ne’e.
“Ita hanesan país ita valoriza tebes ita-nia relasaun ho Indonézia liuliu ba ita-nia kooperasaun hanesan, kooperasaun ekonomia, kooperasaun polítika, kooperasaun kulturál,” nia konsidera.
Governante ne’e mós reforsa: “Nune’e mós tanba ita-nia maluk barak iha Indonézia ba estuda alende serbisu, ema Indonézia barak ne’ebé timoroan nian desendente, iha ne’e mós ema Indonézia barak hela iha ne’e. Timoroan barak mós eskola iha Indonézia, ne’ebé, hanesan ha’u hateten kooperasaun la’o di’ak tebetebes, liuliu mós hakarak tan fó agradese ba Indonézia apoiu ita atu tama ASEAN”.
Ministru Dionísio mós perante mídia konsidera katak durante ne’e ita-nia relasaun ekonomia, kooperasaun ekonomia ho Indonézia la’o di’ak tebetebes, ita importa sasán barak em termos hosi Indonézia, ita esporta uitoan de’it.
“Ne’ebé mai ko’alia katak ita tenke rezolve ita-nia área sira ne’e bele serbisu di’ak liután, hodi bele iha balansu iha ita-nia relasaun ekonómika, relasaun edukasaun nian, polítika, turizmu ho sira seluk,” tenik diplomata timoroan.
Entretantu, serimónia Resepsaun Diplomátika ba Aniversáriu Proklamasaun RI ba 74 ne’e, anima husi Grupu múzika, Anar Band.
Iha animasaun ne’e, banda múzika timoroan ne’e kanta múzika Indonézia nian no múzika Timor nian no mós múzika internasionál hanesan múzika Manado, Sazozo, Ha’u presiza tebes ó no seluk tan hodi anima partisipa sira iha serimónia resepsaun diplomátika ne’e.
Animasaun no resepsaun diplomátika aniversáriu proklamasaun RI ba dala 74 ne’e, asiste no partisipa alende MNEK inklui mós Ministru Defeza no Seguransa, Filomeno Paixão no embaixadór estranjeiru rezidente iha Timor-Leste hanesan Amérika, Filipina, Malázia, Tailándia, Xina, Japaun, Austrália, Singapura, no mós husi parte militár no polísia internasionál, inklui membru diplomátiku Indonézia nian no mós sosiedade indonézia ne’ebé mak hela iha Timor-Leste no mós seluk tan.
Notísia relevante:Parabéns Povu Indonézia”
Jornalista : Nelia Fernandes
Editór : Rafy Belo
