DILI, 27 agostu 2019 (TATOLI) – Ministériu Petróliu no Minerál hamutuk ho Autoridade Nasionál Petróliu no Minerál (ANPM), iha semana kotuk ne’e aprezenta rezolusaun ida kona-ba noameasaun despaixante ofisiál ba atividade importasaun no esportasaun iha kampu Bayu-Undan, maibé seidauk iha desizaun finál ba proposta ne’e.
Desizaun Governu ne’e, ho hanoin ida katak asinatura Tratadu Tasi Timor hanesan projetu ne’ebé sei tranzita husi área konjunta dezenvolvimentu petrolíferu daudaun ne’e ba jurisdisaun eskluziva Timor-Leste nian, maka projetu Bayu-Undan.
Nune’e, Rezolusaun Governu ne’e ho objetivu hodi mantein empreza Altus Oil & Gas Services hanesan despaxante ofisiál, hodi hamenus perturbasaun iha operasaun ne’ebé hala’o hela, tuir ezijénsia obrigasaun internasionál sira ne’ebé asume husi Estadu Timor-Leste bazeia ba Tratadu nian.
“Desizaun semana kotuk adia, tanba ezekutivu sira hakarak analiza kle’an liu no ajusta rezolusaun ida ne’e, no ohin Konsellu Ministru aprova hodi hahú preparativu atu implementa sistema, hodi bainhira 30 agostu hanesan loron ne’ebé Tratadu foun hahú nia validade”, tenik Ministru Estadu Prezidénsia Konsellu Ministru no Ministru Petróliu no Minerál ein ezersísiu, Hermenegildo Augusto Cabral Pereira ba jornalista sira iha Palásiu Governu, tersa ne’e.
Jornalista: Julia Chatarina
Editór: Xisto Freitas
