DILI, 27 agostu 2019 (TATOLI)-Diretór Jerál Peska Ministériu Agrikultura no Peska (MAP), Acácio Guterres, informa iha tinan ne’e, deteta ró ilegál hamutuk unidade 40 na’ok ikan iha tasi Timór, maibé nia materiál ne’e ladún boot no komesa redús ona kompara ho tinan 2018.
Tanba iha tinan kotuk hahú husi janeiru to’o dezembru 2018, deteta ró ilegál husi nasaun viziña sira hamutuk unidade 107 hodi foti ikan tonelada 236.449 iha tasi Timór.
“Sé ita halo kontajen ba osan karik ita lakon biliaun U$1.120 hanesan ne’e”, Diretór Jerál Peska Acácio ba jornalista sira iha edifísiu MAP, Komoro, ohin.
Nia dehan, peskadór ilegál balun mak konsege deteta no balun la deteta, sira ne’e maioria husi país viziñu sira. Ba peskadór ilegál ne’ebé deteta no kaptura ne’e entrega direita ba parte relevante sira atu prosesa.
Diretór Acácio dehan atu kombate atividade ilegál ne’e, Diresaun Jerál Peska labele la’o mesak, maibé presiza iha kooperasaun ho instituisaun relevante sira hanesan, Ministériu Defeza no Interiór liuliu FALINTIL-Forsa Defeza Timor Leste liuhosi Komponente Navál no Polísia Nasionál Timor Leste (PNTL) iha Unidade Polísia Marítima (UPM) nian.
“Ita servisu hamutuk para bele kombate peskadór ilegál iha tasi Timór”, katak.
Oitavu Governu planeia ona liuhosi orientasaun Primeiru-Ministru, Taur Matan Ruak, ba Ministru Agrikultura no Peska atu prepara planu hodi sosa ró tolu iha 2020.
“Iha 2020, ami sosa ró boot tolu ne’ebé sei halo rekrutamentu ba joven sira ne’ebé iha talentu negósiu no sira mak sei jere. Ita prepara joven sira atu lori ró ne’e bá ka’er ikan iha tasi Timór no haree mós movimentasaun peskadór ilegál”, afirma.
Ba orsamentu atu sosa ró ne’e, nia dehan programa ne’e foun husi Primeiru-Ministru atu sosa ró peska nia tolu no ró Komponente Navál no Polísia Unidade Marítima.
“Kada ró ida hamutuk millaun $3, ne’ebé kompañia balun mai halo aprezentasaun no katak ró ida ho folin euro millaun €2,6 ne’ebé ita konta ba osan dólar amerikanu kuaze millaun $3 kada ró ida mas ne’e kompleta ona ho ekipamentu ka’er ikan”, Acácio esplika.
Kompañia Internasionál husi Europeian Damen ne’ebé nia asset iha Vietnam, Malázia no Indonézia halo ona aprezentasaun ba Ministru Agrikultura no Peska no sei lori rezultadu ne’e ba Konsellu Ministru atu diskute.
Notísia relevante : Peska Ilegál Prejudika TL Lakon Biliaun Ida Resin
2020, Governu Planeia Sosa Ró Peska Unidade Tolu
Jornalista : Florencio Miranda Ximenes
Editora : Maria Auxiliadora
