DILI, 28 agostu 2019 (TATOLI) – Membru Konsellu Administrasaun Konsórsiu Internasionál Asisténsia Jurídika (ILAC-International Legal Assistance Consortium), Nina Lahoud, hasoru malu ho Primeiru-Ministru (PM), Taur Matan Ruak, hodi agradese ba konvite selebrasaun tinan 20 Konsulta Populár no halo reflesaun ba pasadu.
Nu’udar ekipa ne’ebé envolve iha Forsa Dame Organizasaun Nasaun Unida (ONU) bainhira Timor-Leste iha konflitu nia laran, nia observa timoroan sira agora la hare ba pasadu, maibé sira nafatin mantein dame no estabilidade, inklui organiza rasik eleisaun pasífiku no dadaun ne’e halo rekonsilisaun ho nasaun seluk.
“Husi Timor-Leste nia esperiensia ne’ebé liu ona konflitu sira ne’e, ha’u admira oinsá mak sira bele hamutuk no bele simu pasadu hodi halo rekonsiliasaun ne’ebé diak ba sira nia nasaun, haluha pasadu no hahú momentu foun, hodi hamutuk no kontribui ba nasaun foun”, tenik Nina Lahoud ba jornalista sira iha Palásiu Governu, kuarta ne’e.
Nia hatutan: “Bele iha pasiensia hodi hamriik hamutuk no dezenvolve nasaun iha dame no rekonsiliasaun ho nasaun viziñu Indonézia hafoin liu difikuldade. Timor-Leste ezemplu ba mundu, oinsá bele haluha pasadu, ba nasaun nia di’ak, maski inimigu no forsa kolonializmu estraga kuaze teritóriu”.
Ba nia, Timor-Leste hanesan nasaun espesiál liu iha mundu bainhira nia halo misaun, tanba ne’e nia agradese no onradu tanba bele hetan konvite husi Governu hodi partisipa iha loron importante ne’e.
“Ha’u admira tanba ema barak mak lakon nia família maibé agora sira hili liu dame ba sira nia nasaun. Tanba ne’e ha’u sente onradu bainhira fila mai Timor-Leste atu partisipa iha okaziaun ida ne’e, tanba tinan 20 la’ós tinan ne’ebé naruk no enkuantu ha’u hare nasaun ne’e iha pasadu iha destrusaun barak”, nia dehan.
“Ha’u gosta ho sistema ne’ebé Timor-Leste adopta iha tinan kotuk liubá, adeus konflitu no benvidu dezenvolvimentu”, nia akresenta.
Nina Lahoud husik advokasia Shearman & Sterling iha 1983, hodi bele hamutuk ho Forsa Dame ONU iha Líbanu hanesan asesora jurídika dahuluk nomeadu ba misaun, no nia serbisu iha ONU durante tinan 33.
Iha ONU, nia ekstensivamente toma konta ba kestaun jurídika, estadu direitu, manutensaun dame, dezenvolvimentu no jéneru, ne’ebé envolve ona iha operasaun manutensaun dame ONU, iha nasaun neen mak hanesan Líbanu, Namíbia, Kamboja, Kroásia, Kosovo, inklui Timor-Leste, iha momentu istóriku no krítiku.
Jornalista: Julia Chatarina
Editór: Xisto Freitas
