iklan

HEADLINE, POLÍTIKA

Diverjénsia Polítika Labele Destroi Interese Nasionál

Diverjénsia Polítika Labele Destroi Interese Nasionál

Eis Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 29 agostu 2019 (TATOLI)—Prezidente Parlamentu Nasionál, Arão Noé de Jesus da Costa Amarál, hateten diverjénsia polítika oioin iha rai-laran tenke kontribui ba asuntu interese nasionál.

Nia dehan, nasaun ne’e atu di’ak ka ladi’ak depende ba timoroan hotu, hanesan ema dehan ‘futuru iha ita-nia liman rasik’, tanba ne’e futuru nasaun ida ne’e nian iha timoroan tomak nia liman.

“Ha’u hein katak ho komemorasaun ne’e bele motiva ita hotu, soe dook tiha diverjénsia polítika. Ita-nia fundadór sira deklara tiha estadu ne’e iha 28 Novembru 1975 ho naran República Democrática de Timor-Leste, entaun demokrasia ne’e la’o, maibé la’ós demokrasia ho diverjénsia atu destroi asuntu interese nasionál,” Arão Noé ba Agência TATOLI, iha Parlamentu Nasionál, kinta ne’e.

Nia afirma, demokrasia ne’e loos, maibé  timoroan tenke hamutuk komunga interese nasionál sai hanesan prioridade, nune’e projeta ba oin ho deklarasaun ida libertamos a pátria, libertamos o povo.

“Se pátria libertada, ho tan aban troka nota entre governu Timor-Leste ho Austrália hatudu ita liberta tan ona Delimitasaun Frontreira Marítima iha Tasi Timor nian,” nia subliña.

Arão informa, hafoin troka nota, projeta ba oin nasaun ne’e sei nakonu ho dezenvolvimentu, maibé atu iha dezenvolvimentu tenke iha pás no estabilidade. Laiha pás no estabilidade dezenvolvimentu mós laiha.

 Jornalista: Evaristo Soares Martins

Editór: Xisto Freitas

iklan
iklan

Leave a Reply

iklan
error: Content is protected !!