DILI, 11 setembru 2019 (TATOLI)-Membru Parlamentu Nasionál husi Bankada FRETILIN, Kongresu Nasionál Rekonstrusaun Timorense (CNRT-sigla Portugés) no Uniaun Demokrátiku Timorense (UDT), apoiu reasaun komandante ein Xefe FALINTIL, Kay Rala Xanana Gusmão nian, hodi sobu lutu kompañia Marino Enterprise ne’ebé tenta impede prosesu konstrusaun ba Portu Tibar iha Munisípiu Liquiça.
Membru PN husi Bankada FRETILIN, Antonino Bianco, hateten, Timor-Leste adopta Estadu ida demokrátiku, tanba ne’e, sidadaun ida-ida iha liberdade atu espresa ninia hanoin bainhira haree desizaun ruma la fó benefísiu ba interese públiku.
“Espresaun Xanana nian nu’udar lider ida, la sente kontente ho desizaun ne’ebé iha bele espresa nia hanoin,” hateten Deputadu Antonino Bianco, ohin, ba Jornalista sira iha Uma Fukun Parlamentu Nasionál.
Deputadu Antonino Bianco sujere di’ak liu atu hato’o lamentasaun ne’e liu husi dalan legál ida maka hato’o rekursu ba Tribunál. Nune’e mós Vise Bankada CNRT, Patrocinio Fernandes, hatete, desizaun Lider Nasionál, Kay Rala Xanana Gusmão ne’e akontese tanba defende interese estadu la’ós interese pesoál hodi aselera prosesu dezenvolvimentu.
“Kay Rala Xanana Gusmão kumpre misaun hanesan lider ida durante dedika ninia-an tomak, defende rai ida ne’e, ohin loron, nia nafatin sente katak estadu presiza ninia responsabilidade moral atu bolu atensaun ba instituisaun estadu,” hateten Deputadu Patrocinio Fernandes.
Xefe Bankada UDT, Gilman Exposto Santos, husu ba instituisaun sira ne’ebé relevante atu tuur hamutuk hodi rezolve situasaun ne’e.
” Di’ak liu hotu-hotu tur hamutuk ho ulun malirin hodi rezolve problema sira ho di’ak para labele kria fali konflitu foun iha nasaun,” hateten Gilman Exposto, atuál prezidente UDT.
Ho situasaun ne’e, Deputadu husi Partidu UDT ne’e rekomenda ba Tribunál atu kuidadu foti desizaun ruma ba disputa rai, liu-liu ba interese Estadu.
Jornalista : Nelson de Sousa
Editór : Francisco Simões
