DILI, 12 setembru 2019 (TATOLI) — Dezlokasaun Prezidente Repúblika (PR), Francisco Gurterres Lú Olo atu ba partisipa reuniaun Asembleia Jerál Organizasaun Nasaun Unida (ONU) iha Nova Iorke, semana oin mai, depende ba desizaun plenária Parlamentu Nasionál.
‘’Prezidente labele halo komentáriu ba kompeténsia deputadu ida-idak ka bankada ida-idak nian. Ha’u ko’alia de’it kona-ba ajenda. Kona-ba votu ne’e desizaun deputadu no bankada ida-idak ninian. Ha’u limita ha’u-nia pozisaun hanesan portavóz ne’e de’it. Labele ba to’o desizaun ne’e’’, dehan nia ba jornalista sira, iha Parlamentu Nasionál, kinta ne’e.
Iha fatin hanesan, Xefe Bankada UDT/FM, Deputadu Gilman Exposto dos Santos, hateten Xefe Estadu iha direitu tomak halo vizita ba iha rai-li’ur.
‘’Prezidente Repúblika ba mós lori nasaun nia naran hodi ko’alia Organizasaun Nasaun Unida. Hotu-hotu presiza hanoin didi’ak hodi apoia Prezidente Repúblika bele dezloka ba iha ONU’’, hateten Gilman dos Santos.
Loloos ne’e, Parlamentu Nasionál halo ona diskusaun ba dezlokasaun Prezidente Repúblika nian iha loron kuarta, maibé la priénxe kuorum, entaun adia ba semana oin.
Tuir ajenda, Prezidente Repúblika, Francisco Guterres Lú Olo sei dezloka ba Nova Iorke iha 18 setembru, semana oin.
Jornalista: Evaristo Soares Martins
Editór: Xisto Freitas
