DILI, 23 setembru 2019 (TATOLI)-Eskola Sekundária Privadu Nobel da Paz sei harii edifísiu foun ho turma 28 no orsamentu mai husi propina estudante sira nian ne’ebé kada fulan dolár tolu, hodi garante atividade letiva sira.
“Kuantidade husi osan ne’e rasik ha’u labele fó sai tanba ne’e segredu. Maibé klaru katak osan saldu ne’ebé rai iha banku sufisiente ona atu halo konstrusaun eskola andár permanente Nobel da Paz nian,” informa Diretór Eskola Nobel da Paz, Pedro Nunes Menezes ba Ajénsia TATOLI, iha nia kna’ar fatin Eskola Nobel da Paz, Quintal boot, segunda (23/09/2019).
Diretór estabelesimentu ensinu privadu ne’e hateten, tuir planu depois ramata ezame nasionál, lansamentu primeira pedra ka fatuk dahuluk hodi hahú konstrusaun ba edifísiu eskola ne’e.
“Lansamentu fatuk dahuluk ne’e realiza ona iha segundu périodu maibé tanba arkitetu ida husi Portugal seidauk konklui dezeña edifísiu ne’e entaun fundasaun seidauk bele halo buat ida. Maibé, planu ne’ebé iha ona, depois ezame nasionál ramata bele realiza ona lansamentu ne’e”.
Manorin na’in eskola Nobel da Paz ne’e esplika, kondisaun eskola privada ne’e labele kontinua hanesan atuál ne’e.
Hanesan fundasaun nia hakarak husi eskola ne’e ba ema seluk maibé tenke iha kondisaun di’ak. Tanba ne’e depois ramata ezame nasionál parte eskola sei aprezenta karta ofisial ba Ministériu Edukasaun Juventude no Desportu (MEJD) hodi hetan koñesimentu.
“Alende haruka karta ba MEJD, ha’u mós sei haruka karta ba membru governu balun inklui laureadu Nobel da Paz, José Ramos Horta,” nia kompromete.
“Tanba propriedade estadu nian ne’e entrega ona mai ha’u uza iha 2009 liuhusi Eis-prezidente Repúblika José Ramos Horta. Apartir husi entrega rai ne’e hodi harii eskola iha 2010, ninia dokumentu hotu hetan ona legalizadu inklui estatutu eskola ne’e hetan mós akreditasaun husi Ministériu Edukasaun” haktuir tan profesór ne’e.
Jornalista : Tomé Amado
Editór : Rafy Belo
