DILI, 11 Outubru 2019 (TATOLI)-Durante tinan 10 (2009-2019) too agora, Forsa Navál SEABESS Estudu Unidu Amerika (EUA) iha Timor-Leste (TL) konstrui edifísiu eskola no klínika hamutuk 100.
Embaixadóra Estadus Unidu Amerika mai Timor-Leste, Kathleen Fitzpatrick, informa, ohin, iha selebrasaun tinan 10 servisu konsekutivu Forsa Navál SEABEES nian iha Timor-Leste no serimónia troka komandu SEABESS batallaun da-haat (4) ne’ebé Komanda husi Officer-in-Charge, LT Evan Wakefield ho Asistente Officer-In-Charge, CCM Kenet Hodel ho membru 27 ba Batallaun da-lima (5) ho membru 27 Komanda husi Officer-In-Charge, LT Daylan Sylvester no Asistente Officer-In-Charge, CUCS Craig Miller ne’ebé hala’o liu husi parede militár iha rezidénsia Forsa Navál Komoro Dili.
Forsa Navál SEABEES EUA maka grupu servisu navál nian ne’ebé ho esperiénsia enjeñaria servisu hamutuk ho Timoroan sira hodi hadi’a eskola, klínika no infraestrutura komunidade sira nian iha Timor-Leste. Kada Grupu Forsa Navál SEABEES servisu iha Timor-Leste durante fulan neen (6) ho F-FDTL no komunidade.
“Ha’u orgullu tebes, durante tinan 10 prezensa Forsa Navál SEABEES EUA kompleta ona projetu atus ida (100) iha Timor-Leste,” hateten Embaixadóra Kathleen Fitzpatrick.
Embaixadóra agradese tanba membru Forsa Navál nain 27 kompleta ona sira nia servisu fulan neen iha Timor-Leste. Membru sira ne’e halo ona projetu sira iha eskola Primária Balibo, Maubisi, Institutu Nasionál Saúde iha Comoro no Eskola Ospitalidade no Turizmu iha Becora.
“Ha’u haree sira servisu di’ak tebes ne’ebé sira halo iha parte asisténsia umanitária nian. Ne’e mak rohan husi destakamentu ho susesu ba Batallaun Navál Konstrusaun Movel númeru haat (4) nian,” hateten Kathleen Fitzpatrick.
Membru na’in 27 ne’e mós husi Detalle Asaun Sívika konstrusaun iha Timor-Leste sei fila fali ba Amerika hodi hasoru malu ho sira nia família.
Nia hatutan, membru Forsa Navál sira ne’e antes mai hala’o misaun, sira la koñese Timor-Leste, maibé hafoin hala’o misaun fulan neen, sira koñese di’ak tebes moris povu Timor-Leste nian, no sira sei fila ba sira nia rain ho memória no esperiénsia furak ne’ebé sira sei rai metin iha sira nia laran para sempre.
Embaixadóra dehan, grupu membru Forsa Navál dalima ne’e sei kontinua finaliza konstrusaun laboratóriu iha Institutu Nasionál Saúde hafoin remata sira sei halo konstrusaun ba sala tolu iha Sentru Formasaun Siénsia Teknolojia, Enjeñaria no Matemátika iha Munisipiu Liquiça no sala eskola rua iha Fatumeta.
Biban ne’e Ministra Edukasaun Juventude no Desportu (MEJD), Dulce de Jesus, hato’o agradese ba Forsa Navál Amerika durante ne’e konstrui ona edifísiu eskola hamutuk 25.
“Ita agradese tanba dezde sira nia prezensa too agora sira harii ona eskola 25 balun ensinu báziku, ensinu jerál ne’ebé koopera ho F-FDTL halo konstrusaun kualidade tebes,” Ministra Dulce agradese.
Dulce dehan, prezensa forsa navál sira ne’e ajuda hanorin estudante sira aprende lian Ingles, Matemátika no organiza estudante sira oinsá aprende estuda ho di’ak.
Ministériu Edukasaun rasik sei koordena nafatin ho EUA hodi ajuda nafatin harii uma eskola ne’ebé aat.
Vise Xefe Estadu Maiór Jenerál FALINTIL-FDTL, Falur Rate Laek hato’o agradese ba Embaixada Amerika no Forsa Navál SEABESS Amerika ne’ebé demonstra sira nia kometimentu konsistente atu servisu hamutuk ho F-FDTL ho Timoroan sira hodi atinje Timor-Leste nia objetivu dezenvolvimentu.
Falur Rate Laek hatutan, Komandu F-FDTL apresia, tanba Forsa Enjeñaria F-FDTL mós envolve iha kooperasaun militár “Harii Hamutuk” envolve, Austrália, Japaun, Amerika no Timor-Leste.
Nia hatutan, Komandu F-FDTL mós prontu servisu hamutuk ho Ministériu Edukasaun hodi halo konstrusaun ba uma eskola sira ne’ebé anin sobu.
Jornalista : Eugénio Pereira
Editór : Francisco Simões
