DILI, 21 outubru 2019 (TATOLI)—Tuir Lei haruka, Xefe Suku ne’ebé eleitu hosi povu atu ukun povu. La’ós atu ukun rai. Tanba ne’e, Sekretáriu Estadu Terra no Propriedade (SETP), Mario Ximenes, afirma, Xefe Suku Comoro, Eurico da Costa, la ‘merese’ atu halo doasaun no halo deklarasaun kompras no venda rai estadu nian ba komunidade.
Notísia Relevante : Okupante Tasi Tolu Hetan Karta Deklarasaun Hosi Xefe Suku
“Xefe Suku ukun povu, la’ós ukun hotu rai. Rai Tasi Tolu proprietáriu Estadu no kompeténsia tomak atu administra rai Estadu mak Diresaun Jerál Terra no Propriedade iha ámbitu SETP ninia mahon,” afirma SETP, Mario Ximenes, hodi hatán ba polémika no preokupasaun komunidade sira ne’ebé utiliza rai Tasi Tolu hodi konstrui uma tanba hetan deklarasaun hosi Xefe Suku Comoro, Eurico da Costa.
SETP Mario Ximenes hateten, so SETP mak halo transferénsia ba prosesu arrendamentu rai estadu no transferénsia sira hotu tenke legal liuhosi estrutura públiku ne’ebé mak serbisu notáriu sira halo.
Mario Ximenes tenik tan, xefe suku Comora la iha kompeténsia tanba lei podér autoridade lokál no lei ba xefe suku sira la fó kompeténsia ruma ba sira hodi halo kompras no venda no halo atribuisaun ruma ou doasaun rai ruma liuhosi deklarasaun ba kualkér sidadaun.
Jornalista : Domingos Piedade Freitas
Editór : Francisco Simões
