ERMERA, 05 novembru 2019 (TATOLI) – Estátua Cristo Liurai lokaliza iha Suku Duku Rai, Postu Administrativu Letefoho, Munisípiu Ermera, inaugura iha selebrasaun tinan 25 ezisténsia Pároku Letefoho iha loron 25 jullu 2019.
Administradór Postu Administrativu Letefoho, Julião Marito de Deus, haktuir servisu konstrusaun estátua inisia no organiza rasik husi Uma-Kreda, inklui Sarani Letefoho sira tun direta hodi harii.
“Orsamentu husi Sarani Letofoho sira no hetan apoiu husi Letefoho-oan sira ne’ebé maka oras ne’e serbisu hela iha Korea. Tanba sira pertense sarani Letefoho, maski sira serbisu iha fatin seluk maibé sira fó nafatin kontribuisaun”, tenik Julião Marito.
Kona-ba rai ne’ebé kontrui estátua ne’e, tuir Administradór Postu, la pertense rai Estadu maibé hanesan rai kultura ne’ebé ninia na’in maka uma-lisan lubuk ida.
“Entaun tau naran Cristo Liurai tuir katuas sira dehan foho ne’e ukun na’in sira ninian no ukun-na’in sira nia foho pertense Letefoho tanba ne’e tau naran Cristo Liurai tanba iha relasaun ho ukun-na’in sira”, nia haktuir tan.
Parte seluk, Xefe Suku Lauana, Miguel Gomes Maia, hateten inisiatór ba konstrusaun estátua Cristo Liurai maka Amu Domingos Maubere no inisiativa husi komunidade suku rua.
“Suku Haupu no Duku Rai maka iha inisiativa tanba na’in husi foho ida ne’e. Inisiativa mós husi avó sira ne’ebé akumula husi uma-kain neen no pertense suku rua hanesan uma na’in, maibé suku seluk iha Letefoho ne’ebé la’ós uma-na’in mós envolve hotu ba obra ne’e”, nia haktuir.
Kona-ba orsamentu ba konstrusaun estátua ne’e, tuir Xefe Suku ne’ebé envolve mós iha Komisaun Pároku Letefoho ne’e dehan porsentu 75 husi komunidade Letefoho no porsentu 25 husi Igreja liuhosi kooperasaun Amu Pároku sira ho maluk sira ne’ebé serbisu iha rai-liur, emprezáriu sira, no maluk sira ne’ebé serbisu iha governu (kontribuisaun pesoál) ba atividade konstrusaun ne’e.
Nia dehan, antes ne’e komisaun submete ona proposta ba Ministériu Komérsiu Industria no Agrikultura (MCIA) no Ministériu Solidaridade Sosiál (MSS) momentu ne’ebá, nune’e parte Governu ajuda foos balun.
“Ami iha inisiativa halo proposta ba Governu maibé rezultadu balun seidauk iha resposta. Ami hatama proposta antes 25 jullu 2019”, nia informa.
Xefe Komunitáriu ne’e dehan tan, orsamentu konstrusaun husi komisaun, engloba komisaun kiik sira ne’ebé hahú husi estasaun sira to’o parókia, fulan kotuk enkontru maibé seidauk akumula hotu.
Komisaun rasik sei prodús livru kona-ba konstrusaun estátua atu submete ba nasionál atu deskreve hahú husi konstrusaun to’o ramata gastu orsamentu hira, tanba ne’e daudaun ekipa ida sei prodús hela.
“Kalkulasaun orsamentu ba konstrusaun ne’e hamutuk $70.000 resin, komisaun halibur hela dadus no sei iha osan maka restu hosi montante ne’e”, nia informa.
Tuir Julião Marito,obra ne’e ramata iha tinan ida nia laran, hahú harii komisaun no ramata iha 25 jullu 2019, hafoin taka komisaun iha 29 jullu 2019.
Iha Koñesimentu Governu Sentrál
Maski Governu la envolve direta ba konstrusaun ne’e maibé autoridade sira antes ne’e fó hatene ona ba Governu.
“Ami fó koñesimentu liuhosi Igreja ba Governu Sentrál, husi parte rua ne’e iha koñesimentu hotu”, nia salienta.
Nia mós salienta, komisaun iha intensaun ona atu loron ida bele halo kolaborasaun ho Governu.
“Durante ne’e ami nia Amu Pároku iha duni mehi ida ne’e maibé ba futuru sei kria kondisaun balun atu turizmu sira bele mai vizita”, nia tenik.
Xefe Suku ne’e haktuir, hafoin inaugurasaun no loke ba públiku, iha loron sesta, sábadu no domingu bainaka sira sempre tama no sai ba fatin ne’e maibé seidauk selu.
“Tama no sai sei gratuita tanba Igreja hamutuk ho Administradór Postu seidauk kria kondisaun maibé iha ona hanoin atu kria kondisaun ruma atu bele hetan reseita”, nia katak.
Jornalista: Julia Chatarina
Editór: Xisto Freitas
