DILI, 6 novembru 2019 (TATOLI) – Primeiru-Ministru, Taur Matan Ruak propoin eis Ministru Negósiu Estranjeiru no Kooperasaun, José Luís Guterres (LUGU) lidera Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál no Merkadu (ZEESM) liuhosi reuniaun Konsellu Ministru, ohin.
“Prezidente interinu ZEESM nia mandatu sei ramata iha 30 novembru agora. Entaun, Konsellu Ministru hola desizaun simu proposta hosi Primeiru-Ministru hili José Luís Guterres mak sei sai prezidente foun ba ZEESM,” tenik Ministru Prezidénsia Konsellu Ministru, Hermenegildo Augusto Cabral Pereira iha Paláçio do Governo.
Nia dehan, propoin antes atu prezidente foun bele prepara aan hodi responde ba estrutura Rejiaun Administrativa Espesiál Oé-Cusse Ambeno no ZEESM ne’ebé seidauk iha difinitivu.
Lee mós: KM Mak Sei Deside Mandatu Prezidente Autoridade RAEOA
Entretantu, fó hanoin fali, ZEESM hahú iha tinan 2014, iha ne’ebé eis Primeiru-Ministru, Marí Alkatiri mak hanesan Prezidente dahuluk durante períudu ida.
Iha nia mandatu, Alkatiri konsege transforma Oé-Cusse sai hanesan sidade númeru rua iha Timor-Leste hodi harii Sentru Elétrika Sakato, Aeroportu Rota de Sândalo, irrigasaun no seluk tan.
Jornalista: Hortencio Sanchez
Editór: Xisto Freitas
