LIQUIÇÁ, 13 novembru 2019 (TATOLI) — Administrasaun Munisípiu Liquiçá, husu Governu Sentrál atribui ona kompeténsia ba Governu lokál iha área turizmu nian, tanba Liquiçá poténsia iha área refere.
Sekretáriu Administrasaun Munisipál Liquiçá, Renato Nunes Serrão, hateten laiha atribuisaun kompeténsia ne’e halo projetu turizmu komunitária balun abandona.
Munisípiu Liquiçá poténsia iha área turizmu nian hanesan tasi ibun Ulmera, Casait, Aipelo, Lauhata, Maumeta, Dato (Leopa, Dotasi, Guilho), área Maubara nian hanesan, masin Vatuvou, Tibalau to’o área Loes nian.
Nune’e mós edifísiu istóriku sira hanesan relijiaun nian, eis Komarka Aipelu no eis rezidénsia portugés nian bele dezenvolve sai turizmu istóriku. Aléinde subar fatin funu na’in sira ne’ebé iha ona prosesu identifikasaun.
Iha parte foho nian mak foho Kutulau ne’ebé lokaliza iha Suku Leorema. Foho Kutulau ne’e iha tempu loron boot populasaun hosi suku seluk ba paseiu iha foho refere.
“Se polítika ne’e atraza hela, maibé atribuisaun kompeténsia ne’e bele fó mai iha área turizmu nian para depois ami bele tau-matan ba buat sira ne’e lokaliza iha área Liquiçá nian”, nia informa ba Ajénsia TATOLI, ohin.
Sekretáriu Administrasaun Munisipál Liquiçá hein hela polítika hosi Governu Sentrál kona-ba atribuisaun kompeténsia ba Governu lokál.
“Nune’e ami bele iha kompeténsia katak buat kiik-oan, mobiliza povu ami bele halo, hanesan ami bele mobiliza povu, maibé ami mós seidauk bele halo jestaun tanba ne’e kompeténsia Governu sentrál limita hela”, subliña Sekretáriu Administrasaun Munisipál.
Administrasaun Munisípiu Liquiçá ko’alia ona Ministériu Turizmu no Ministériu Administrasaun Estatal hodi atribui kompeténsia iha área turizmu nian bele fó ba Governu lokál, maibé nonook hela.
Notísia relevante : Administrasaun Liquiçá Iha Ona Hanoin Reabilita Fatin Turizmu Maumeta
Autoridade Liquiçá Arrekada Reseita ba Publisidade Hamutuk Rihun $9-Resin
Jornalista : Evaristo Soares Martins
Editora : Maria Auxiliadora
