LIQUIÇÁ, 13 novembru 2019 (TATOLI) – Sekretáriu Munisípiu Liquiçá, Renato Nunes Serrão, hatete bainhira Governu Sentrál fó autoridade ba Munisípiu Liquiçá hodi regulariza publisidade dezde 2016 mai to’o agora arrekada ona reseita rihun $9-resin.
“Progresu ne’ebé husi polítika deskonsentrasaun fó ona para ami regulariza publisidade. Dezde 2016 mai ne’e ami hetan ona nove mil e tal, reseita tama iha kaixa Ministériu Finansa nian, ita mak jere. Kuandu haree husi dadus estatístika, ami Liquiçá segundu husi Dili tanba Dili reseita barak”, Renato informa ba Tatoli iha edifísiu administrasaun munisípál Liquiçá, ohin.
Ho retornu ne’e, Governu Sentrál fó apresiasaun tanba Liquiçá nia kontribuisaun reseita husi publisidade boot liu kompara ho Autoridade Munisipál hanesan Baukau, Ermera ho Bobonaru.
“Sira seluk ne’e balun dólar 100”, Renato dehan.
Sobre publisidade ne’e, Renato dehan tuir dekretu lei 3/2017 estabelese ona nia tabela própria. Reseita husi publisidade ne’e kontribuisaun husi empreza Timor Telecom, Heineken, OPPO no Tiger.
“Sira ne’e tinan ida dalaruma selu rihun ida-resin, tanba ne’e ami hetan nove mil. Tinan dahuluk de’it ami hetan três mil resin kuandu munisípiu sira seluk dólar 100, 200, to’o agora mós sei nafatin hela, ami iha mudansa”.
Tanba ne’e mak polítika desentralizasaun fó mai, fatin sira turizmu, no estasionamentu sira bele dezenvolve hodi rekolla reseita. “Osan boot mak lae, mas osan ki’ik sira ne’e bele tama daudauk ona”.
Aléinde ne’e, reseita seluk mak husi rai, uma, ne’ebé Terras no Propriedade halo arrendamentu ba ema sira oukupa rai.
Renato salienta polítika ne’ebé Governu fó hela mak atu identifika hodi halo estasionamentu iha merkadu sira ne’e depois karreta sira para karik tenke selu, nune’e regulariza sidade.
“Dezeñu ita halo ona. Loloos konstrusaun ita halo tinan ne’e, mas orsamentu Governu kansela filafali, agora, tau fali orsamentu atu halo estasionamentu ne’e. Orsamentu ami prevee rihun 50”, nia dehan.
Jornalista : Evaristo Soares Martins
Editora : Maria Auxiliadora
