DILI, 25 novembru 2019 (TATOLI) – Gabinete Apoiu Atividade Konjuge Prezidente Repúblika (GAAC-PR-sigla portugués) apoia halo instalasaun bee mos, eletrisidade inklui apoiu materiál no hadi’a haris-fatin ba kbiit laek Rogaia Pires ho ninia oan feto defisiente ne’ebé hela mesak iha aldeia Ra’anu, Suku Serelau, Postu Administrativu Lautem Munisípiu Lautem.
Tuir nota ne’ebé Agência Tatoli asesu, família kbiit laek durante ne’e iha difikuldade boot atu asesu ba bee mos no eletrisidade tanba hela mesak, tanba ne’e Prezidente Repúblika, Francisco Guterres Lú Olo no ninia espoza, Cidália Lopes Nobre Mouzinho Guterres, deside oferese apoiu ba sidadaun ne’e tuir nesesidade.
Nune’e, servisu instalasaun ba bee mos no eletrisidade responsabiliza hosi pessoál tékniku hosi Prezidénsia Repúblika, enkuntu kona-ba harii sanitáriu no apoiu materiál maka responsabiliza hosi Xefe Aldeia no juventude sira.
Alende instalasaun bee mos no eletrisidade, GAAC-PR apoiu mos materiál hanesan semente, kalen no sasan seluk tan hodi harii haris-fatin.
Cecilia Pires espresa ninia sentimentu kontente ba apoiu ne’e, tanba durante ne’e sira hela mesak no iha difikuldade oioin.
“Ha’u senti kontente tamba bee moos mai ona no ahi (eletrisidade) mai ona,” dehan nia.
Xefe Aldeia Ra’ano Andre Fernandes, orgullu no apresia tebes ho intervensaun husi Xefe Estadu ba família kbiit laek ne’e.
“Ha’u hato’o obrigado wa’in tebes ba estadu liuliu Prezidénsia Repúblika liuhosi gabinete espoza, ne’ebé fó ona ajuda ba ha’u nia komunidade. Ha’u sente kontenti no hato’o obrigado wain ba estadu no nain ulun sira”, tenik autoridade lokál ne’e.
Antes ne’e, Xefe Kaza Sivíl Prezidénsia Repúblika hamutuk ho Gabinete GAAC-PR apoiu ona sasan nesesidade báziku no fundu uitoan, hodi nesesita inan kbiit laek ho ninia oan defisiensia ne’e nia moris.
Jornalista: Cipriano Colo
Editór: Xisto Freitas
