AILEU, 26 novembru 2019 (TATOLI)-Dadus Komandu Polísia Nasionál Timor-Leste (PNTL), Munisípiu Aileu divulga katak munisípiu ne´e rejista kazu krime hamutuk 143. Husi kazu sira ne´e, krime Ofensa Integridade Fízika Simples (OIFS) mak rejistadu aas.
Dadus 143 ne´e rejistadu iha baze dadus kriminál Komandu PNTL Munisípiu Aileu nian dezde janeiru to´o novembru 2019. Husi númeru ne’e porsentu 100 rejista ba iha Ministériu Públiku (MP) ne’ebé mak hanesan na´in ba prosesu krime.
Detallu husi krime 143 ne’e mak hanesan krime omesidu neglijente, abandonadu, ofensa integridade fízika simples no gráve, Maus Tratus ba konjuje, ameasa, koasaun, koasaun seksuál, violasaun seksuál, abuzu seksuál ba menór, aktu seksuál ho adolsente, devasa, kondusaun sein karta, arma proíbida, obsusaun ba autoridade públika, furtu simples, furtu agravadu, danu, inséndiu, kazu ativa no violénsia domestika.
“Krime ne’ebé nia númeru boot liu maka ofensa integridade fízika ho númeru 62. Tuir maka kondusaun sein karta, maus tratus, no ofensas integridade agravadu no abuzu seksuál ba menór, devasa, arma proíbida no violasaun seksuál”, informa Komandante Polísia Munisípiu Aileu, Superintendente Polísia, Jorge Monteiro ba Ajénsia TATOLI iha nia knaar fatin, Aileu, ohin.
Motivu hosi krime OIFS ne’ebé sai hanesan krime ho númeru boot ne’e, tuir Superintendente Jorge Monteiro, fatór primeiru tanba relasiona ho disputa rai, fatór ida tan maka konsumu alkol liu limitasaun, nune’e mós atividade grupu joven sira ne’ebé governu bandu ho grupu ne’ebé governu la bandu ne’e akontese tanba la satisfeitu tanba bandu ida seluk, seluk la bandu.
Atu prevene situasaun sira ne’e inkluzivamente krime OIFS, Komandante ho deviza ai-funan rua ne’e informa katak Komando PNTL Munisípiu Aileu iha ninia planu estratéjiku ne´ebé hanesan implementa ona hanesan maka destaka Ofisiál Polísia Komunitária (OPS) iha kada suku hodi apoia autoridade lokál, hodi asegura seguransa iha nível suku.
Nune’e mós Komandu PNTL Munisípiu Aileu halo sensibilizasaun ba lei sira ne’ebé vigora iha ita nia nasaun, alende ne’e envolve mós komunidade no estudante iha programa prevensaun krime iha Munisípiu Aileu.
Entretantu, Munisípiu Aileu ne’ebé kompostu hosi postu administrativu haat, suku 33, aldeia 149 ho totál abitante 54.687 situasaun enjéral la’o di’ak, kalma no hakmatek.
Notísia relevante:Joven Aileu Hakribi Violénsia
Jornalista : Antónia Gusmão
Editór : Rafy Belo
