Joven Balun Ameasa Xefe Suku Tanba La Hetan Formulariu F-FDTL
DILI,11 dezembru 2019 (TATOLI)–Komandante Polisia Nasionál Timor-Leste (PNTL) Komisáriu, Faustino da Costa, informa oras ne’e, Xefe Suku balun hetan amesa hosi ninia joven rasik tanba la hetan formulariu atu sai kandidatu ba membru FALINTIL-Forsa Defesa Timor-Leste.
Komisáriu Faustino, dehan keixa ne’e simu diretamente hosi autoridade lokal suku balun foin lalais, tanba rezeita atu fó karta rekomendasaun hodi priense formulariu forsa nian.
Notísia Relevante:Komisaun Rekrutamentu F-FDTL Sei Aumenta Formuláriu
Tuir kritéria joven ne’ebé maka atu hetan formulariu hodi sai kandidatu ba forsa estadu ne’e tenke livre hosi krime, iha naran diak, la envolve iha grupo arte marsiál no krime seluk tan. Tanba joven hirak ne’e balun, antes ne’e komete ona krime, envolve iha grupo arte marsiál no krime seluk tan.
Notísia Relevante:Foti Formuláriu Vaga F-FDTL, Juventude Rihun “Invade” Sede Suku
“Porezemplu iha vaga F-FDTL deklara atu halo deklarasaun naran di’ak kona-ba joven ida la envolve grupu organizasaun arte marsiál , xefe suku no xefe aldeia sira la halo deklarasaun ne’e, xefe suku no xefe aldeia sira hetan ameasa husi nia joven sira rasik,” dehan, Komisáriu PNTL ne’e ba Jornalista sira iha Caicoli,ohin.
Komisáriu Faustino da Costa, hatutan maske nia parte simu ona keixa, maibé lakohi publika identidade autoridade lokál hirak ne’e ba públiku tanba atu asegura seguransa ba sira.
Notísia Relevante:Falur ho Lere Buka Solusaun ba “Problema” Rekrutamentu F-FDTL 2020
“Ami koordena ona ho komandu F-FFDTL atu haree kestaun sira ne’e labele akontese ba ita nia autoridade sira,”Nia hateten.
PNTL mós iha ona planu hodi koordena ho ekipa rekrutamentu konjunta hosi Ministériu Defesa ho instituisaun F-FDTL atu kansela naran hosi joven sira-nia ne’ebé involve iha kazu ameasa no intimidasaun ne’e hosi lista formulariu rekrutamentu ne’ebé maka priense ona.
Notísia Relevante:Governu Aprova Rekrutamentu Soldadu F-FDTL Na’in-600 ba Tinan Oin
Entretantu, tuir desizaun komandu F-FDTL sei kontinua halo distribuisaun formulariu ba joven sira ne’ebé maka oras ne’e seidauk hetan. Prosesu distribuisaun ne’e sei halo durante loron 14 fulan-dezembru hahú oras dader to’o lokraik iha Kuartél Jerál F-FDTL Fatuhada Dili.
Jornalista: Eugénio Pereira
Editór:Francisco Simões
