MEJD Hahú Diskute Reformasaun Kurríkulu
DILI, 16 dezembru 2019 ( TATOLI) – Ministériu Edukasaun, Juventude no Desportu (MEJD) liuhusi nia ekipa téknika sira hahú diskute reformasaun kurríkulu ba eskola ensinu báziku terseiru siklu tanba konsidera la kondiz ona ho situasaun ohin loron nian.
Ministra Edukasaun, Juventude no Desportu, Dulce de Jesus hateten, ejizénsia mundu ohin loron nian ejize MEJD iha Timor-Leste atu muda husi kurríkulu uluk nian, tradisionál, tanbastudante la´ós atu hatene matéria ida de´it maibé ezije mós estudante sira atu halo analiza ba materia sira.
“Ita hatene ohin loron ho mundu teknolojia ne’ebé muda beibeik, ita mós presiza hanorin kompeténsia sira ho maneira olístiku bazeia ba pensamentu krítiku no abilidade atu halo analiza ba sosio-emosionál komunikasaun, kolaborasaun no kreatividade,” dehan Ministra Dulce de Jesus Soares iha nia diskursu ba diskusaun reforma kurríkulu terseiru siklu iha salaun INFORDEPE Matadoru, ohin.
Governante ne´e esplika, husi kurríkulu ne’ebé mak estadu ka governu Timor-Leste (TL) implementa ba ninia eskola sira, tradisionalmente foka de’it ba lee no matemátika.
Tanba ne’e, husi kurríkulu 2010 nian ne’ebé la kondis ona ho kurríkulu sékulu 21 nian, entaun MEJD obriga atu hodi halo reforma ba sistema kurríkulu ne’e rasik oinsá atu moris hamutuk iha planeta ida ne’e, presiza ema atu respeita malu no komprende malu hodi buka solusaun ba problemas globál.
“Ita tenke muda kurríkulu aprendijazen atu nune’e bele ajuda labarik sira bele haree luan no kle´an ba situasaun no kondisaun mundu ohin loron nian. Karik dala ruma ho mudansa kurríkulu ne’e balun hanoin katak sistema ne’e aas liu ba labarik sira maibe ida ne’e mak ejizénsia mundu ohin loron nian,” nia konsidera.
Notísia relevante:Rezultadu Ezame Nasionál Sai Instrumentu Sukat Dezempeñu Estudante
Jornalista : Tomé Amado
Editór : Rafy Belo
