DILI, 17 dezembru 2019 (TATOLI)-Komisaun Rekrutamentu Konjuntu Ministériu Defeza ho Komandu FALINTIL-Forsa Defeza Timor-Leste (F-FDTL) sei termina prosesu fahe formuláriu rekrutamentu F-FDTL foun ba joven feto-mane iha territóriu Timor-Leste too 22,000.
Notísia Relevante : Komisaun Rekrutamentu F-FDTL Sei Aumenta Formuláriu
Vise Prezidente Komisaun Organizadora, Nuno de Carvalho dos Santos deklara, kuarta aban (18/12/2019), komisaun sei termina fahe formuláriu rekrutamentu hodi atinje númeru formuláriu 22,000.
Prosesu fahe formuláriu ne’e rasik ekipa fahe ona kobre too munisípiu 12 inklui Rejiaun Administrativu Espesiál Oe-Cusse Ambeno (RAEOA) no Postu Administrativu 65 ho Suku 450 atu joven timoroan hotu bele iha oportunidade hanesan hodi kompete iha vaga ba membru F-FDTL foun iha tinan 2020.
“Ita sei termina fahe formuláriu vaga F-FDTL hamutuk 22,000 iha territóriu Timor-Leste,” informa Nuno de Carvalho dos Santos, ohin, liuhusi konferénsia imprensa iha Kuartél Jenerál F-FDTL, Fatuhada, Dili.
Nuno informa mós katak, númeru formuláriu ne’e komisaun rekrutamentu aumenta hodi fó oportunidade ba ema hotu bele kompete, tanba antes ne’e komisaun limita kada suku hetan de’it formuláriu 50 ne’e la sufisiente.
Komisaun rekrutamentu sei deskola fila-fali ba munisípiu no suku sira hodi foti vaga ne’ebé aplikante sira prenxe ona iha loron 06 janeiru 2020. Tanba ne’e, komisaun husu ba aplikante sira tenke hatama dokumentu hotu- hotu ho kompleta ba idak-idak nia sede suku iha loron 03 janeiru 2020.
Hafoin ekipa ba rekolla vaga ne’e, sei lori mai Dili hodi halo selesaun ba dokumentu hotu-hotu tuir kritériu molok fó sai rezultadu ba públiku.
Iha oportunidade ne’e, komisaun organizadora hato’o agradese ba autoridade suku, polisia, Igreja Katólika no Diresaun Nasionál Notariadu Ministériu Justisa ne’ebé fasilita joven feto-mane hodi trata Billete Identidade (BI) no Sertidaun RDTL no Sekretaria Estadu ba Asuntu Kombatente no Libertasaun Nasionál (SEAKLN) ne’ebé fó deklarasaun aplikante sira hodi kompleta dokumentu sira.
Jornalista : Eugénio Pereira
Editór : Francisco Simões
