DILI, 25 dezembru 2019 (TATOLI)– Polisia Nasionál Timor -Leste (PNTL), kuarta kalan (25/12/2019), tuku 20:00 OTL, kaptura suspeitu na’in ualu (8) ne’ebé deskonfia lanu todan hodi sobu prezépiu ne’ebé komunidade ho juventude sira harii iha Aldeia 12 Novembru, Suku Comoro, Postu Administrativu Don Aleixo, Munisípiu Dili.
Notísia Relevante : Ema Sona Membru F-FDTL Na’in Ida iha Tasi-tolu
Afonso Hornay nu’udar responsavel ba prezépiu ne’e informa katak, kazu ne’e akontese husi problema hemu tua entre joven sira, ikus mai sira sadik malu ho hamosu problema baku malu entre joven sira too baku rahun sasán iha prezépiu laran hanesan pintura pay natál, imajen kosok oan Na’i Jesus Kristu, lampu natál no koluna rahun hotu.
Afonso lamenta tebes tanba loron Natál ne’ebé tuir loloos sai nu’udar loron importante ba sarani hotu iha mundu inklui Timor-Leste atu festeja ho dame no domin, maibé juventude sira tenke hamosu fali violénsia.
Hafoin akontesimentu, Polisia Eskuadra Comoro Dili ho autoridade Konsellu Polisiamentu Komunitáriu (KPK) too kedas fatin akontesimentu hodi investiga no kaptura suspeitu sira ne’ebé lanu.
“Joven sira ne’e baku malu tanba lanu todan too ataka prezépiu Natál mós sira baku rahun hotu, no polisia too kedas fatin hodi kaptura ona suspeitu na’in ualu (8) no joven balun halai polisia sei buka tuir hela,” dehan Afonso informa ba Ajénsia TATOLI.
Afonso hatutan, nu’udar prezépiu na’in sira rasik la koñese autór sira ne’ebé baku rahun prezépiu no sira rasik durante ne’e nunka halo problema ho autór sira ne’ebé envolve iha kazu.
Nia dehan, komunidade Aldeia 12 Novembru rasik lamenta ho kazu ne’e, tanba autór sira ho kondisaun lanu maka sobu prezépiu, nune’e husu ba autoridade polisia hodi investiga kazu ne’e para bele hatene motivu loloos husi problema ne’e.
Ajénsia TATOLI tenta konfirma kazu ne’e ba Segundu Komandante Polisia Munisípiu Dili, Superintendente Xefe, Euclides Belo, seidauk bele fó konfirmasaun.
Jornalista : Eugénio Pereira
Editór : Francisco Simões
