DILI, 15 janeiru 2020 (TATOLI)- Durante periodu fulan ualu (Janeiru-Agostu 2019), Ministériu Interiór liuhusi Diresaun Nasionál Servisu Migrasaun, hatama reseita ba kofre Estadu millaun $3,9785.
Notísia Relevante : Ahi Mate iha Motain Afeta ba Servisu Imigrasaun no Alfándega
Reseita ne’e ekipa Servisu Migrasaun kobre husi movimentu sidadaun estranjeiru sira tama sai liuhusi Aeroportu Internasionál Prezidente Nicolau Lobato, Postu Fronteira Batugadé, Salele, Sakato no Wesilo-Oe-Cusse nian.
Diretór Jerál Servisu Migrasaun, Superintendente Polísia Agostinho da Silva Gomes, ba jornalista iha Servisu Migrasaun Vila-Verde Dili, ohin, hateten, Migrasaun rekolla taxa ladún boot, tanba iha setembru 2019 liubá, Governu Timor-Leste ofisiálmente aplika ona livre vistu ba sidadaun Indonézia no sidadaun nasaun Europeia kompostu nasaun 20.
Durante tinan 2019, Migrasaun atende mós sidadaun estranjeiru ne’ebé halo movimentu tama Timor-Leste hamutuk 223,628 no sai husi Timor-Leste hamutuk 222,559.
Sidadaun estranjeiru ne’ebé halo estensaun ba vistu turista, servisu, no vistu estadu espesiál iha 2019 hamutuk 9,869 no vistu autorizasaun rezidénsia hamutuk 2,096.
Adidu Servisu Migrasaun sira iha Konsuladu Kupang, Bali no Singapura no nasaun seluk mós hasai paresér hodi fó vistu ba sidadaun estranjeiru hamutuk 2.269 no vistu rezidénsia hamutuk 326, no paresér ba vistu edukasaun ba sidadaun estranjeiru ne’ebé hala’o estuda iha Timor-Leste hamutuk 47.
Migrasaun mós fó vistu servisu ba traballadór estranjeiru ne’ebé servisu iha Projetu Tasi Mane Bayu Undang nian hamutuk 258.
Superintendente Polísia Agostinho hatutan, Setór Opresaun Servisu Operasaun Migrasaun mós halo operasaun dilijénsia sumáriu iha tinan 2019 ba ema hamutuk 533. Husi prosesu ne’e aplika medida apreensaun tuir lei migrasaun ho abandona Timor-Leste hamutuk ema na’in 61 husi Indonézia, Repúblika Mali, Pakistaun, Cambodia, no Índia.
Migrasaun mós rejistu no halo prosesu ba sidadaun estranjeiru ne’ebé tama ilegál mai Timor-Leste la uzu dokumentu hamutuk ema 22. Ema hirak ne’e agora iha prosesu investigasaun nian laran.
Setór Operasaun Migrasaun mós aplika koima ba sidadaun estranjeiru sira ne’ebé viola regra selu multa tuir Lei Migrasaun 144 ba Kompañia sira ne’ebé fó servisu ba traballadór rai li’ur sala uza vistu turizmu hodi servisu sei selu multa $4,000,00 ba leten no ba pesoál $1,000,00 ba leten.
Migrasaun mós halo kanselamentu ba vistu sidadaun estranjeiru na’in 27, tanba viola Lei Migrasaun nian.
Jornalista : Eugénio Pereira
Editór : Francisco Simões
