DILI, 20 janeiru 2020 (TATOLI)-Juíz Administradór Tribunál Distritál Baucau (TDB) José Gonçalves, hateten hahú inisíu fulan-fevereiru ninia parte sei hahú funsiona hikas prosesu julgamentu movel ba sidadaun sira ne’ebé maka hela iha área juridisaun Baucau, Viqueque, Manatuto no Lautem.
Planu julgamentu movel ne’e la’os hala’o de’it durante fulan-fevereiru, maibé tuir nia sei kontinua halo iha futuru ho objetivu maka atu hakbesik ona justisa ba povu hodi reduz númeru kazu pendente sira iha Tribunál Baucau.
“Ha’u hanoin iha fulan oin mós hala’o ona julgamentu movel iha loron 03 – 07 fevereiru 2020 no sei kontinua nafatin tuir planu no programa Tribunál Rekursu nian,”relata Juíz Administradór Tribunál Distritál Baucau ne’e ba TATOLI, iha Tribunál Rekursu, foinlalais.
Antes ne’e nia parte implementa ona julgamentu movel ba sidadaun ho tulun orsamentu no téknika hosi Programa Nasaun Unida ba Dezenvolvimentu (UNDP-sigla inglés), maibé programa ne’e paradu kuaze tinan ida ho balun ona tanba laiha orsamentu.
Tuir dadus kazu pendente iha Tribunál Baucau hamutuk 3029, kazu krime purvolta 217, kazu sivíl 214 no kazu sira seluk tan. TDB iha juíz na’in sia ho ofisiál justisa na’in sia.
Iha tinan 2020, Juíz Administradór ne’e hateten sei implementa planu prioridade hanesan konstrusaun rezidensia ba juís sira, instalasaun cobby house rua hodi koloka ba utilizasaun hanesan sentru krime no sivíl.
Jornalista : Domingos Piedade Freitas
Editór : Francisco Simões
