DILI, 30 janeiru 2020 (TATOLI)-Diresaun Jestaun Merkadoria Munisípiu Dili (DGMMD) konfirmadu ona atu sobu baraka sira iha Kampu Alor, Dili, tersa (04/02/2020).
Notísia Relevante : Evita Ema Hela Fali, Munisípiu Dili Sei Sobu ‘Baraka’ iha Kampu Alor
Xefe Departamentu Jestaun Merkadoria Guarda Munisípiu Dili, Berta Santa Gonçalves Vieira, ohin, iha nia servisu fatin, informa, sira nia parte halo ona koordenasaun ho autoridade seguransa atu tersa mai ne’e sobu ona barraka 76 iha Kampu Alor.
“Ami sei sobu hotu baraka ne’ebé vendedór Indonéziu sira husik hela hodi muda hotu ona ba Plaza Golgota,” hateten Berta Santa.
Iha parte seluk, komunidade Kampu Alor, Maria do Rego Caetano hatete, sira prontu sai no halo mamuk baraka sira ne’e hodi kontribui ba sidade Dili nia ambiente, maibé presiza hanoin mós komunidade nia indemnizasaun.
“Ami prontu sai husi ne’e, maibé tenke fó ami-nia direitu,” dehan Maria Caetano.
Maria nu’udar Nain ba baraka dehan prontu kolabora maibé atende sira hanesan umanu ida no kria fatin seguru ida ba sira.
Jornalista : Osória Marques
Editór : Francisco Simões
