DILI, 10 fevereiru 2020 (TATOLI) – Bankada Parlamentár CNRT iha Parlamentu Nasionál (PN), husu povu tomak tau fiar nafatin ba VIII Governu Konstitusionál atu buka meiu hotu halo prevensaun ba Coronavirus.
Bankada Governu ne’e, halo deklarasaun polítika relasiona ho Coronavirus, tanba konsidera moras ne’e rapidamente trasmite ba ema hodi ataka ema-nia respiratóriu no hamate ema iha tempu badak nia laran.
Vise-Xefe Bankada Parlamentár CNRT, Patrocino Fernandes, observa iha inísiu tinan 2020 mundu sente xokadu ho prezensa Coronavirus ne’ebé deskobre iha sidade Wuhan, Repúblika Populár Xina.
“Bankada parlamentár CNRT iha uma fukun hato’o mós apresiasaun boot ba esforsu VIII Governu Konstitusionál tanba toma ona medida adekuada hodi salva lalais timoroan sira hosi Coronavirus. Ami husu povu tomak atu tau nafatin fiar ba Governu hodi buka meiu hotu-hotu, hodi proteje ita hotu hosi Coronavirus no moras seluk”, tenik Deputadu Patrocínio liuhosi plenária, segunda ne’e.
Iha biban ne’e, Bankada CNRT mós husu boot ba timoroan hotu atu labele pániku, hodi nune’e halo aktu diskriminativu hasoru xineza sira ne’ebé halo daudaun negósiu iha Timor-Leste.
Lori Bankada CNRT nia naran, nia mós kongratula Governu Xina ne’ebé halo esforsu maka’as nune’e virus ne’e labele espalla ba nasaun sira seluk.
“Timor-Leste mós preokupa oinsá maka buka meiu atu evakua timoroan lubuk ida ne’ebé halo hela estudu iha sidade Wuhan tanba Governu Xina deklara ofisialmente halo izolamentu ba Wuhan, ema labele sai no labele tama. Graças a Deus, Governu Nova Zelándia iha loron 5 fevereiru 2020 bele fasilita ho sira-nia aviaun hodi evakua timoroan sira hamutuk na’in-17 sai hosi Wuhan no agora daudaun iha hela prosesu izolamentu iha Nova Zelándia molok fila-hikas mai ita-nia rain”, deklarasaun polítika hosi Bankada Parlamentár CNRT.
Nune’e, Bankada CNRT iha biban ne’e hakarak partilla ninia agradesimentu kle’an ba Governu no Povu Nova Zelándia tanba hatudu sira-nia solidariedade ba Timor-Leste, hanesan uluk sira sempre fó apoiu ba Timor-Leste iha situasaun defísil bainhira iha prosesu luta ba ukun rasik-an.
Alem de ne’e, Governu Nova Zelándia ativamente foti parte nafatin iha prosesu rekonstrusaun Timor-Leste nian no fó bolsa estudu ba timoroan sira lubuk ida.
“Ami mós la haluha fó ami-nia agradesimentu kle’an ba Governu Xina liuhosi emEmbaixadór Xina iha Timor-Leste tanba halo komunikasaun di’ak tebes ho Governu Timor-Leste, nune’e ho permisaun Governu Xina nian, timoroan sira iha Wuhan bele sai hosi zona izolamentu nian’, dehan nia.
Bankada CNRT hato’o mós solidariedade ba povu xinez, liuliu populasaun sidade Wuhan ne’ebé hasoru daudaun epidemia Coronavirus no hasa’e orasaun ba Nai-Maromak atu Xina bele ultrapasa lalais situasaun ida-ne’e.
Jornalista: Evaristo Soares Martins
Editór: Xisto Freitas
