DILI, 28 fevereiru 2020 (TATOLI) – Komandu Polisia Nasionál Munisípiu Dili, ohin, purvolta tuku 09.30 dadeer, kaptura suspeitu ho inisiál CDC ne’ebé lori katana tenta taa membru FALINTIL-Forsa Defeza Timor-Leste (F-FDTL) Komponente Navál ne’ebé hala’o hela atividade jogu futsal iha Kampu Jardín 05 de Maiu, Colmera, Dili.
Komandante Polisia Nasional Timor-Leste (PNTL) Munisípiu Dili, Superintendente Xefe, Armando Monteiro, informa, suspeitu komete iha krime arma branka lei númeru 5/2017, no la koopera ho membru F-FDTL sira bainhira husu nia atu entrega arma ne’e, maibé suspeitu simu lia hasoru hodi tenta halo fali agresaun fíziku ba militár sira.
“Ami kaptura suspeitu CDC komete krime arma branka tanba lori katana tenta taa vítima sira mai husi membru F-FDTL komponente Navál ne’ebé hala’o hela atividade jogu futsal,” dehan Komandante Armando Monteiro.
Tuir observasaun Ajénsia Tatoli hatudu katak, bainhira membru polisia halo investigasaun ba suspeitu ho kondisaun oin no matan mean hotu, ne’ebé deskonfia konsumu tua hodi halo suspeitu ne’ebé hela iha área Faról- Motaél la kontrola-aan hodi lori katana kro’at la’o iha estrada públiku.
Suspeitu CDC agora iha hela sela detensaun hodi submete ba prosesu investigasaun molok aprezenta ba Ministériu Públiku.
Jornalista : Eugénio Pereira
Editór : Francisco Simões
