DILI, 03 marsu 2020 (TATOLI)—Sekretáriu Jerál Partidu FRETLIIN, Marí Alkatiri, observa katak ohin loron partidu boot sira labele sai fatór determinante maibé partidu ki’ik sira mak sai determinante fali ba kualkér konfigurasaun foun.
Nia hateten, Partidu FRETILIN nia estratéjia atu manán eleisaun tuir mai no manán ho maioria absoluta, mesak no depois mak halo inkluzaun.
“FRETILIN nia estratéjia atu manán iha eleisaun tuir mai, manán ho maioria absoluta, mesak no depois mak halo inkluzaun. Tanba ohin loron, ó la absoluta, partidu ki’ik mak sai fali determinante,” Sekretáriu Jerál FRETILIN, Marí Alkatiri informa ba jornalista sira hafoin partisipa iha Selebrasaun Loron Nasionál Veteranu iha Praça de Procklamação da Independéncia, Palásiu Governu, Dili, ohin.
Nia hatutan, ho dinámika polítika atuál FRETILIN lakohi hadau ukun iha dalan klaran ne’e maibé prepara estratéjia ba eleisaun normál ne’ebé sei akontese iha 2023 iha tinan hirak oin mai.
“Maibé Partidu FRETILIN úniku partidu ida-ne’ebé prontu. Se hakarak aban ba eleisaun, FRETILIN prontu,” nia dehan.
Koligasaun foun ne’ebé lidera husi CNRT daudaun ne’e bele dada iis no moris ka lae, Sekretáriu Jerál FRETILIN, Marí Alkatiri hatán, hodi fó ninia predisaun katak koligasaun foun ne’ebé lidera hosi CNRT sei la moris.
“Koligasaun foun ne’e la moris,” dehan Alkatiri ho liafuan badak.
Notísia Relevante: Partidu Lima Hamutuk ho CNRT Asina Ona Akta Koligasaun Foun
Jornalista : Evaristo Soares Martins
Editór : Cancio Ximenes
