MP Alega Pena Tinan Tolu Ba Arguidu Rua Taa Lezadu Na’in-tolu
DILI, 10 marsu 2020 (TATOLI)–Ministériu Públiku (MP) liuhosi Prokuradór Domingos Barreto, husu ba Tribunal Distritál Dili (TDD) atu aplika pena prizaun tinan tolu no suspende fulan-neen (6) ba arguidu na’in-rua ho inisiál JJG no DAJP, tanba envolve iha kazu asaltu hodi taa kanek lezadu na’in-tolu; Fávio, Nazário ho Fortunato iha área Kampu Baru, Comoro, Dili.
Liuhosi audiénsia julgamentu iha TDD, segunda (09/03/2020), Prokuradór Domingos Barreto, solisita ba juíz koletivu Afonso Carmona, António Fonseca ho Evangelino Belo, atu aplika pena prizaun ne’e tanba bazeia ba faktu ne’ebé antes ne’e lezadu, sasin no inklui arguidu rasik nia deklarasaun no produsaun prova ne’ebé prodús iha tribunál iha indísiu forte.
Ba arguidu na’in-haat (4) seluk hanesan JCB, Z, JRF ho VC, Prokuradór Domingos Barreto, husu tribunal atu foti desizaun tuir konviksaun tribunál nian.
Iha fatin hanesan, Advogadu Privadu Marçal Macarenhas, husu tribunál atu absolve totalmente krime ne’ebé MP imputa ba nia kliente tanba iha julgamentu sira liubá iha deklarasaun sira-nian arguidu ho lezadu kontradís hodi hamosu dúvida ba tribunál.
Antes ne’e, MP akuza arguidu sira ho krime ofensa integridade fízika simples ne’ebé previstu iha artigu 145 Kódigu Penál Timor-Leste kona-ba krime ofensa integridade agravadu, artigu 146 no Lei Arma Branka númeru 05/2017.
Rona tiha alegasaun ne’e, tribunál deside adia fila-fali julgamentu ne’e ba iha loron 24 marsu 2020, tuku 16:00 otl, hodi rona desizaun.
Jornalista : Nelson de Sousa
Editór : Francisco Simões
