DILI, 10 marsu 2020 (TATOLI)–Prezidente Tribunál Rekursu, Deolindo dos Santos hateten Tribunál Rekursu (TR) seidauk bele pronúnsia (ko’alia) kona-ba diskusaun polítika ne’ebé oras ne’e la’o hela iha rai-laran tanba sei fó tempu ba polítiku sira atu kontinua diskute to’o hetan konkluzaun.
Prezidente Tribunál Rekursu, Deolindo dos Santos hato’o pozisaun ne’e, hafoin enkontru ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.
“Ha’u la ko’alia ho Prezidente Repúblika kona-ba kestaun polítika, tanba diskusaun ne’ebé la’o daudaun, nu’udár diskusaun polítika liu ne’ebé hanesan mós polítiku-na’in sira nian. Nune’e, husik líder sira hala’o sira-nia diskusaun no tribunál seidauk bele tau tan buat ruma iha ne’ebá atubele ko’alia kona-ba kestaun polítika. Bainhira to’o tribunál ona no prosesu diskusaun ne’e kompletu ona maka tribunál bele pronúnsia,” dehan Prezidente Tribunál Rekursu, Deolindo dos Santos, ba jornalista sira hafoin enkontru ho Prezidente Repúblika (PR) iha Palásiu Prezidente Nicolau Lobato.
Antes ne’e, koligasaun foun ne’ebé lidera husi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente Ein-ezersísiu UDT, Rodolfo Aparício Guterres, Prezidente Interinu FM, Egídio de Jesus, no Prezidente PUDD, António de Sá Benevides halo ona audiénsia ho Prezidente Repúblika, maibé Prezidente Repúblika rasik konsidera koligasaun seidauk prenxe rekezitu balun.
Iha biban ne’e, Prezidente Repúblika fó biban ba partidu polítiku idak-idak realiza ona ninia konferénsia estraordinária hodi responde ba pedidu Prezidente Repúblika (PR) nia pedidu.
Hafoin partidu hirak-ne’e hala’o sira idak-idak nia konfrerénsia, iha sesta (10/3/2020), koligasaun foun delega ona Sekretáriu Jerál Partidu Demokrátiku no portavóz koligasaun foun, António da Conceição ‘Kalohan’ hodi submete tan karta audiénsia daruak ho Prezidente Repúblika (PR), Francisco Guterres “Lú Olo”, hodi indijita Xanana Gusmão sai Primeiru-Ministru.
Jornalista : Cipriano Colo
Editór : Cancio Ximenes
